【重口味慎入】那日在溫泉，我浸到月經杯都「消失」
同老闆開會，壓力真係好大。你有壓力我有壓力，有人會流汗，由臭狐發出想散會嘅有味抗議；有人會跳草裙舞，賣笑不賣肉，氹老闆開心，搏早啲完會；而內斂嘅我，只會安靜地收縮陰道。冇錯，係收縮陰道。點解？因為我有用月經杯囉。其實一般女生都不太了解長年不見天日的黑洞，最多M到時會感覺到子宮收縮，但陰道收縮，冇用過月經杯真係聽都未聽過。那日開完會，我9秒9狗衝出會議室，同同事講：「大鑊喇，我太緊張個杯好似塞到好入……」
撰文：Miss Sex 2.0
衝到入廁所，一如所料，月經杯果然入到有兩節食指咁深。不過我經驗老到，冷靜下來立即做個半踎姿勢，再將食指同中指螺旋形咁扭住，搵返個月經杯底部。三兩下手勢，將縮起嘅月經杯拉返落嚟。
其實我以前並非如此了解自己的隧道。我甚至以為，用過直徑有1.5厘米嘅月經杯，用完之後，陰道以後都可以用來打保齡球。天真的孩子一夜長大，而我嘅天真，其實是被溫泉洗去。
來潮浸溫泉 好在有個杯
話說，之前我與閨蜜相約去台灣短遊，特登book間有私家溫泉房的靚酒店。點之兩個人竟然一上飛機就一齊「見血」……
車！M到之嘛，駛乜驚！好彩上個月買咗個月經杯看門口，而閨蜜就用開棉條，大家咁熟，決定來個「血盟」，照浸溫泉！
其實，跟閨蜜相識有10年，感情雖然好，但今次要赤身露體相對，都係一大考驗。但我萬萬估唔到，更大的考驗喺陰道等緊我。
話說，溫泉浸到尾聲，閨蜜先上水抹身。點知，一上水已經有幾條血柱由大腿內側流落嚟。我望咗一眼即刻低頭以免閨蜜尷尬，佢爆完粗就死死地氣處理「凶案現場」。原來棉條吸水太多，不勝負荷。棉條浸溫泉係唔work！當時，我自以為用月經杯係威威之舉，皆因月經杯就唔怕吸水太多，亦唔會怕感染，只要浸之前倒咗啲血就得。所以我沾沾自喜咗一陣先施施然從溫泉出浴，順手清潔一下月經杯，叫閨蜜唔好望過嚟。
消失的月經杯？
我伸隻食指入去摸下個杯喺邊，心涼咗一截……平時伸一隻或兩節食指已經搵到，家陣伸哂成隻都唔見，唔通個杯入咗時光隧道？
我真係傻豬豬，我點解會諗唔到溫泉會加快血液循環，令陰道充血收緊將月經杯推到子宮方向？死啦，唔通我要喺台灣搵婦科醫生「拔杯」？定係等到今晚陰道放鬆，慢慢瀡返出嚟再搵過……咁會唔會充血太多有病……當時我緊張到已經無法正常思考，遇到類似情況，其實係應該放鬆身體，尤其係陰道嘅肌肉，然後用深蹲或單腳跨坐，總之係最舒服就手嘅姿勢取出月經杯。再唔得先至揾信任嘅朋友或者直接去睇醫生。可惜，當下我已經「震都手埋」咁踎喺地下（因為踎可以令陰道打開多啲同易用力啲），用中指盡量伸到最入搵，終於，掂到個杯尾喇！個杯似乎係比水壓到歪咗少少。但係，只係掂到個尾，我又可以點拎返出嚟？橫死掂死，我用埋姆指、食指一齊武力對待！唔得，好很痛。
我望望頭先血流成河、但呢刻已經整理好儀容嘅閨蜜，口震震咁問：「你可唔可以……當自己係婦科醫生咁，幫我搵啲嘢？」
順帶一提，閨蜜係女同性戀，所以我先覺得佢可以幫到我。如果係一般直女，可能好似以前嘅我咁，連自己陰道同尿道都唔識分，又或者係男朋友，搵完之後以後都唔駛旨意搞嘢，我就即刻搭的士睇醫生。
閨蜜義字行頭，二話不說叫我瞓低，然後兩三下手勢，就夾到個杯出陰道口，再叫我自己拎返出嚟 ，鬆一口氣。事後佢得戚咁豎起食指同中指，擺出類似《神探伽利略》手勢，話平時用開，熟手無難度。
為環保之餘，諗清楚先好用
經過呢個真.血盟之後，我同佢嘅感情又進一大步。閨蜜冇畀我嚇驚，反而都想試用月經杯。上網睇到，好多用月經杯嘅人都會力讚佢環保，又冇即棄衛生巾化學物質混合血嘅鹹魚味，但我就咁諗：
假如你陰道肌肉好發達，你就要警剔一下個杯會唔會畀肌肉擠得太入；
如果你連自己陰道都唔知係邊，唔該你搵好位先；
又或者覺得掂一掂都會受傷，就用棉條過渡下先；
如果你鍾意做水晶甲，亦未必適合用；
如果你係處女，又覺得只要有外物入侵就等於被「破處」、又會介意的話，咁就等真係自然發生後先用啦；
當然仲有，唔好浸溫泉（婦科醫生又話，經期間女性抵抗力相對減弱，比較容易受到細菌感染。）
不過，月經杯好處的確多籮籮：唔洗好似尿片咁焗住，用咗好似冇用；幾乎無臭，因為經血冇乜接觸空氣產生細菌，亦冇同衛生巾上嘅化學品混合而發出異味，所以血倒出嚟，同普通血冇分別。你甚至可以觀察經血顏色、同血塊多少，評估最近身體狀況。
有朋友話：「用月經杯係重新認識自己身體。」所言甚是也。M巾令女士們滴血不沾，但月經杯唔單止要你做血手屠夫，仲可以大概認識自己陰道結構。而只要對身體足夠了解、懂得適時放鬆肌肉，你就會發現：「月經杯又有咩好怕喎！」
【性誕快樂】閨密 girls' talk：人有三急，口水當潤滑劑得唔得？
我一直以為陰道就只係一個通道，為來經、性愛、生仔。除此以外，佢係「冇生命跡象」嘅器官。喺用月經杯之前，我仲問過「用完會唔會鬆」嘅傻話。而當你發現，原來同老闆開一場會，已經可以令你個杯縮到咁入，你就知道陰道生來不只為進出。