【2018米芝蓮】「容記小菜王」首獲推介 食客揚言日後排大隊即走
大排檔名物沙拉骨街知巷聞，坊間盛傳該菜式由容記小菜王大老闆易偉容首創，這間首次登上「米芝蓮車胎人美食推介」的食店，以燒腩仔、沙拉骨等招牌菜聞名油尖旺，延續已光榮結業的深水埗舊店之勢。有店內食客認為，米芝蓮非心目中選擇食店的參考指標，又揚言「逢見排隊人龍的食店必調頭走人」，認為味道及方便度最重要。
容記小菜王位於太子道西，鄰近太子地鐵站，前身是紥根深水埗近30載的同名食店，結業一年後，老闆易偉容偕同其餘三位合伙人將食店大改革，重新開張。今日現場所見，由於午飯時間已過，食店人流不多，其中從事物流的食客李先生首次幫襯：「咁啱路過，如果你唔講都唔知登上米芝蓮，都擔心因為咁樣之後會多人排隊，會盡量避開唔食，因為覺得係吹捧造勢居多。」另一枱食客陳小姐亦首次偕朋友幫襯，她指店內食物價格相宜，如日後因名氣而加價則未擬「返兜」幫襯。
延續舊店之勢，燒腩仔及沙拉骨為店內招牌名菜，前者細碟售$78、大碟價錢則售$168，燒腩仔以焗爐燒製，配有自家製芥末醬伴食。至於沙拉骨（$86），則配備獨家沙律醬，同屬必食推介。
該店海鮮部負責人張先生指，食店生意一直興旺，主打的晚市更見座無虛席，平日「翻枱」至少兩轉，周末高峰時期，生意額更有至少八十枱以上。他相信與食店價錢大眾化有關，記者翻查餐牌所見，小菜平均售價約$68至$168，普遍百多元有交易。
張先生續指，店内以小菜聞名，亦有供應貴價海鮮包括海蘇鼠斑、東星斑等，「東星斑兩斤賣$988，其他地方食都要成$1288一條㗎！」不過，他指，龍躉兩味（碧綠炒球及清蒸頭腩）僅售$298，也是不少食客必點之選。張先生又表示，食店走平民化路線，但不少名人與老闆容哥熟稔，其中藝人羅蘭及胡楓亦是捧場客之一。
容記小菜王大老闆易偉容，來頭相當巴閉，40年前曾飄洋過海，獲菲律賓前總統馬可斯聘為御廚，舊店曾於2009年獲米芝蓮推介。
