【南港島線通車】鴨脷洲茶餐廳不敵加租結業 小商戶憂街坊情不再

撰文:陳嘉敏
出版:更新:

走在鴨脷洲大街,盡是滿滿的街坊情懷—這邊一個主婦正在西餅舖內挑選麵包;街口兩個穿着校服的學生在小食店前等撈麵;乾洗店、茶餐廳、電器舖、錶舖⋯⋯居民的生活所需一應俱全。然而走着走着,眼前出現一座稍有違和的建築物:利東站。
港鐵南港島線(東段)將於12月28日通車,新車站利東站的其中一個出口正正位於鴨脷洲大街。「鐵路效應」下,業主已開始加租,有經營十多年的街坊茶餐廳「身先士卒」,於加租壓力下決定只營業到明年1月中;另有街坊商戶指,鄰舖間關係融洽,經常聚會,若無奈結業,往日情懷只能淪為回憶,倍感唏噓,「我哋真係盡量挽留啦,搵得少唔緊要嘅,但無得畀人生存,人哋點去維持?」

南港島線利東站其中的A1出口位於鴨脷洲大街。(陳焯煇攝)

鴨脷洲大街的一角,開着一間「輝記車仔麵」,小小的舖面由老闆三哥及老闆娘三嫂一手一腳打理。剛淥完一碗麵,兩口子又忙着招呼下一位客人:「四餸36蚊,送罐汽水,自己去雪櫃攞啦靚女。」

輝記一碗四餸車仔麵包飲料賣36元,於現今市道算經濟實惠。(陳焯煇攝)

熟稔租戶每周相聚

每天招呼街坊熟客,三哥三嫂不知不覺已做了15年。三哥說,鴨脷洲居民多數是水上人,性格純樸;他們與附近的租戶亦早已稔熟,不時舉辦聚會聯誼,「有時聖誕、中秋呀,就喺門口一齊燒嘢食,年年都係咁㗎啦。」老闆娘搭嘴:「唔一定中秋新年㗎,逢係禮拜日都會喺度打麻雀開大食會,打邊爐燒嘢食都有,大家喺度傾偈想當年囉!」更指商戶一早相約定聖誕節25日開聖誕派對,還會交換禮物。

幫襯輝記的多數是附近的街坊。(陳焯煇攝)

憂被逼離場街坊情不再

不過,隨着港鐵新線伸延至區內,三嫂不禁擔心這些歡聚場面將淪為回憶,「我哋做開十幾年,有班街坊喺度其實大家都好開心,如果要離開真係好欷歔。」三哥指,知道區內有商戶已被加租一倍,擔心如自己遭同樣情況,將吃不消無奈離場,慨嘆區內或相繼遭連鎖店進駐。三哥又對人流升幅不甚樂觀,甚至擔心鐵路方便居民外出消費,反會影響生意,「通咗車呢度人流應該無乜幫助嘅,(南港島線)係方便啲人出去,無方便啲人入嚟,呢度又無商場又無戲院乜都無,入嚟做乜嘢呢?」輝記的租約明年年尾才到期,三哥希望屆時業主發現人流增長不似預期,會「手下留情」。

三嫂則指,為了街坊情,如業主加幅不多,他們都會盡力撐,「真係盡量挽留啦,佢話加租加得咁上下,再做多一個約囉,寧願辛苦啲。」不過,始終主動權不再他們手上,唯有慨嘆,「搵得少唔緊要嘅,要畀人做先得嘛,無得畀人生存,人哋點去維持?」

三哥三嫂擔憂業主乘南港島線通車大幅加租,冀可守住小舖,延續街坊情。(陳焯煇攝)

對正地鐵口 茶餐廳率先結業

對正車站出口、有17年歷史的利發餐廳,則成為第一間維持不住、忍痛離場的小商戶。有傳業主對其加租一倍,舖租高達十萬元一個月,惟負責人夏小姐不欲多談租金,只確認利發營業至明年1月14日便告結業。屆時適逢年關,夏小姐也不禁憂心忡忡,「徬徨就一定徬徨㗎啦,我個女又細個,又要供樓,8個伙記新年流流無嘢撈啦,過年個個都等錢洗。」

利發餐廳不敵租金加幅,只營業至1月14日。(陳焯煇攝)

她又懷念昔日與伙記打拚的日子,「有生意就盡量做,無生意就齊齊抖,傾吓偈吹吓水煲吓湯。」不過,懷念歸懷念,夏小姐卻想得豁達,對來勢洶洶的港鐵並無怨懟,「一個社會嘅繁榮一定要有交通方便,天下無不散之筵席,馬死落地行囉,做唔到老細咪做伙記」。

大口哥已在鴨脷洲大街打鐵逾50年。(陳嘉敏攝) 

打鐵店屹立50年

鴨脷洲大街除了街坊情,原來亦臥虎藏龍,街口轉角開着一間「榮記五金」,老闆郭兆榮憑着一門打鐵好手藝,由1964年開舖至今,已歷經52個春秋。人稱大口哥的老闆說,以前漁業興旺,漁船配備需求大,大街附近全盛時期共有15、16間打鐵舖,但隨着漁業式微,需求漸降,其他「打鐵佬」逐漸退休,最後一個行家亦於10年前結業,只剩下他一人「捱世界」。

大口哥其實現在已是半退休狀態,「過下日辰嘛!」記者採訪當日,有街坊經過見到舖內的風爐欲購買,大口哥卻拒絕,「呢個我無嘢做貪得意揼㗎咋,唔係賣㗎!」他說現時是漁業淡季,故生意不太好,閒時幫街坊打一些電器配件,例如冷氣機水盤,免卻他們搭車出市區的交通時間。對於南港島線通車,大口哥雲淡風輕,「到時先算啦,加得多咪退休囉。」「完全唔驚?」「唔驚,係驚無馬中啫!」他大笑。

大街開滿服務街坊的小舖。(陳焯煇攝)
臨近港鐵通車,鴨脷洲大街的店舖已陸續加租,街上亦出現吉舖。(陳焯煇攝)
你可能感興趣