維園跳舞群組|郵輪海洋光譜號乘客毋須等檢測結果可離船恐成漏洞

撰文:孔繁栩
出版:更新:

變種病毒Omicron殺入社區,一名28歲國泰空姐返港後染疫,再傳染常到維園跳廣場舞的62歲母親,後者之後傳給舞友及另一舞友的印傭,形成「維園跳舞群組」,當中9名屬空姐母親的密切接觸者,本周日(2日)登上郵輪「海洋光譜號」出公海遊,郵輪今早提早回航。
政府今日下午安排全船3,700人需接受檢測,不過乘客毋須等待結果便可離船,有乘客大惑不解,擔心一旦有乘客受感染會流入社區,「萬一我確診咗,返咗去,成棟大廈同身邊人都會好麻煩」;亦有乘客坦言Omicron避無可避,「你喺望月樓食飯,都唔知隔離個人會咁(確診)架嘛。」

+1

乘客:點解唔等埋呢?咁我去邊呢?

首批離開郵輪的余小姐表示,今早8時接獲通知需要回航,約下午1時半陸續安排乘客落船接受檢測,不過乘客毋須等待檢測結果便可離開,余小姐對此大惑不解,「檢測做咗5分鐘走得,其實我都擔心,覺得好奇怪,報告結果應該幾個鐘就有,應該好快,點解唔等埋呢?」

余小姐擔心一旦有陽性結果的乘客流入社區,會加劇疫情,「你畀我走,咁我去邊呢?萬一我確診咗,返咗去,成棟大廈同身邊人都會好麻煩,依家逼於無奈都要返屋企,周圍走嘅話會好危險。」

乘客陳太指出,雖然不清楚自己有否與該9名密切接觸者同處過,但所有乘客理應完成接種疫苗,及上船前有核酸檢測報告,認為毋須擔心,「香港任何地方都有機會受感染啦,就好似你喺望月樓食飯,都唔知隔離個人會咁(確診)架嘛。」

黃先生就稱,理解政府安排,冀望乘客離開郵輪後立即回家,「如果真係有事實搵你,咁多人都唔知可以擺邊度,可以理解呀。」