維園年宵開鑼 市民搶購1米高桃花敬佛 「一千蚊都唔使抵喎」

撰文:黃煦緻
出版:更新:

農曆新年將至,闊別一年的維園年宵今日(16日)復辦,有市民一早入場,購入約1米高的桃花,打算用作敬佛,興奮地指「一千蚊都唔使,好開心好靚啊,又抵喎」。又指「過年擺鮮花,我覺得個人好精神。」亦有家長第一次帶同兒子逛年宵,惟今年乾貨區從缺,她認為較為可惜,期望明年恢復乾貨區,「多啲嘢唔同嘢買」。

▼1月16日 維園年宵花市開鑼▼

+29

維園年宵今日首日復辦,今早10時陸續有花農準備開檔,大約11時許人流逐漸增加。市民葉女士準備了約2000元買花,手持一棵大桃花的她表示,桃花用作敬佛用,興奮地指「一千蚊都唔使」。她稱,以往「年宵一開就即刻嚟買」,惟去年因疫情緣故,政府宣布取消年宵,「舊年有錢都買唔到,今年我好開心,啲花好靚」。

「過年擺鮮花,我覺得個人好精神」

她又指,以往是下午時份才過來買花 ,不過今早特地早早前來,擔心「賣晒啲靚花」。問及如何判斷何謂「靚花」?她笑言「唔知啊,啲花好合眼緣,好似見到啲花笑咁。」她續指,打算在年宵逛一逛才到花檔取花,希望買些水仙、蘭花,「有啲攞嚟敬佛,有啲喺屋企自己擺」,直指「過年擺鮮花,我覺得個人好精神!」

葉女士(右)入場選購桃花,她興奮指「一千蚊都唔使。」(林靄怡攝)

花檔嘆人流比疫情前少 旺丁不旺財

陳先生亦有購買桃花,自言是桃花大王新發花園的擁躉。他表示,花了500多元購入桃花,「年年都幫襯佢買……啲花開得又靚又開到底,非常之好。」並打算將桃花放置在家中的客廳。被問及今早人流是否較為冷清,他指「第一日就啱啱開啫,啲人冇咁快嚟嘅。」

新發花園負責人倪女士表示,雖說桃花是自家種植,但人手及肥料相較以往較為昴貴,料貴約10%以上。現時一棵中型桃花定價大概600多元,之前定價400至500元左右。她又指,今早人流非常少「今朝都冇人流,你睇睇邊有人行啫」,更比疫情前年宵第一日「人少好多」,加上旺丁不旺財,客人較多只看不買。

年宵不設乾貨及熟食區感可惜

謝女士今日帶同兒子參與幼稚園的行年宵活動。她指,兒子是第一次行年宵,兒子對記者表示「開心」。被問及今年乾貨區從缺,她認為較為可惜,期望明年恢復乾貨區,「多啲嘢唔同嘢買」。

另外,在附近居住的謝太購入年桔,她認為之前年宵有乾貨區及熟食區,「有就高興啲開心啲」,惟也明白「因為疫症冇辦法啦」。

現場觀察所見,水仙花細盤定價約268元,大盤則為448元;五代同堂細盤128元、大盤168元;一細盤滿堂彩約198元、一大盤大紅大紫約868元,藏寶園更需968元;日本桃花大盤約680元,細盤約530元。

▼1月16日 維園年宵花市銅鑼灣糖街入口設「紅運鐺頭」牌坊▼

今年沿用紅、黃、綠燈形式疏導人流

食環署早前公布,2023年農曆年宵市場於今日(年廿五)至22日(年初一)凌晨2時,一連7日在15個地點舉行,共設922個濕貨攤位銷售年花。除相關防疫措施外,各銷售點會應用科技措施監察人流數量並控制場內人數,以方便市民有序入場。

署方表示,當人流增多,取票系統會啓動,市民可於現場取票,或下載免費流動應用程式遙距取票。收到通知後,在60分鐘內到達召集區便可進場。15個年宵市場的人流及輪候情況,會以紅、黃、綠燈形式,在各年宵市場現場及食環署網頁上顯示,以方便市民知悉人流情況。