【自我增值】眼界只得抖音海底撈？　喺香港職場　英文好先係王道

普通Local School的朋友同名校生最大差異，往往在於英語能力。

一個典型St Paul's Co-ed的中六生，除了追讀《神鵰俠侶》與練水，通常已經起碼完整讀過一冊哈利波特或相等份量的英文小說；相反，一個典型的本地學校學生，流連旺角新之城回家後，基本上拒絕任何形式的英語讀物。

往後的一切，DSE及大學，以至往後人生的路向，普遍有著巨大差異。雖然SJ也見識過同樣25-30歲的年輕人，一樣有中六畢業但創業成功年賺千萬，也有碩士畢業精通四國語言，但依然在職場上載浮載沉，常自覺懷才不遇之流。但普遍而言，人在香港，英文勁，事業已經贏左一半。

任何文職：英文絕對必須

做文職的「任何人」，無論係船務公司文員，到律師行Paralegal，以及銀行各部門Fresh Grads到經理等，每日面對的文件幾乎99%係英文文件，而處理的電郵亦全部係英文。

英文讀寫能力高，基本上係必須。而如果你英文特別出眾，更容易在同輩脫穎而出，原因係如果要處理重要文件／電郵，甚至係要搵人做Supervisor，英文好的人可謂不二之選。

銷售類：OK，普通話都越來越重要，但英文好依然係屈機

無論做投行Sales定名店店員，同來自世界各地的客戶溝通首選肯定係英文，雖然近年越來越多內地客，但始終英文都係無可取代的地位。

無論你是否爆數，一有海外客，假如在其他同事口窒窒時，你可以對答如流，上司見到都肯定刮目相看。

紀律部隊：英文好先做到Leader

無論做散仔定幫辦，大部分文件依然係以英文為主，例如所有警隊的刑事檔案，基本上都係用英文寫。要晉升到「沙展」或者做個稱職的督察，往往要英文好寫到靚Report，能夠準確運用詞彙及文法。相反，寫到一舊舊的英文，睇到上頭都O嘴，無論你做事幾叻，比人觀感就係你無料到。

職場以外：學好英文 眼界更闊 (Uncle Siu名言)

假如你甘心一輩子做過普通不過的香港人，絕對唔會去西方國家讀書／工作／旅遊，咁其實都冇咩所謂，正所謂大灣區都大把機會，「任何人」返惠州買樓都分分鐘發達（曲曲地），係咪？

但當所有高官有錢人的仔女，撇除他們父母的公開言行，基本上拖男帶女去美國英國等地讀書同定居，肯定係有嘢比較好，可能係空氣冇咁污染，食物比較安全，人都Nice啲，人身自由有保障等等。

時至今日，大部分暢銷全球的電影，依然係Hollywood製作。學好英文，眼界除了抖音的跳舞肥仔片以及海底撈以外，眼界也拓闊至倫敦的歌劇，聖誕節的時代廣場，以及書局裏所有英語世界的暢銷小說。

SJ結語

2018又快到尾聲，好對人問「你的新年願望是什麼」，對於自身而言，每年成長當然有各樣希望達成的新目標，但其中一樣多年不變的，大概是繼續學好英語這回事。對於並非以英文為母語的人而言，或者我們永遠都在學，而這亦是很值得繼續追求的一項人生事業。

【原文轉載自StealJobs.com。StealJobs全面透露各行各業人工，工時，晉升前景，以及入行攻略，歡迎匿名提供收入資料。】

立即下載《香港01》，緊貼公務員職位空缺、勞工處筍工推介，了解CV、面試致勝技巧！
下載網址：
https://hk01.app.link/bkbJyY5t4O