情人節唔想畀人「食咗隻車」　使幾多先合理？　專家：1000都嫌多

常言道，男人一生只為尋覓一個肯挨麥記的女人。在百物騰貴、人工卻「始終如一」的世代，一個食你唔飽又餓你唔死的廿蚊餐（今已漲價至24蚊）早被視為愛情試金石。今日便是情人節，買咩花、送咩禮物肯定又刮起港男港女一陣腥風血雨。到底是否有錢就情人節，無錢就一定「愁人節」？月入萬頭的新鮮人，如何在這個「鬥閃」的節日過得情人嗰關，又過到自己荷包呢？

要做個醒目打工仔，記得睇多幾條「職場處境題」啦！ ​（按此進入）

李兆波：與其中計不如「蜜蜜送」

計計數，要做齊情人節指定動作：睇戲、買花、送禮、晚飯，保守估計過千元已算最低消費，對初出茅廬的年輕人而言確是「乸脷」。中大商學院助理院長李兆波認為，與其在情人節中商家佬的計，不如平日「蜜蜜送」，以「正常價」買花和小禮物炮製驚喜，到情人節當日，或許情人就未必要你花不正常的價格去消費平日正常的節目。對應月入14K的年輕人，若有儲蓄習慣，他認為情人節單日消費1,000元已是極限，若無儲蓄習慣，就宜「將貨就價」，把花費控制在500元內。

Budget有限，買禮物便要有策略。要買得精明，李兆波建議不妨趁旅行時看見「啱心水」的東西便先入手，因為不少商品在外國的價格比香港的低。假如要買iphone、美容儀器等動輒幾千元的禮物，便最好挑選優惠最多的信用卡消費。雖然現時很多商戶提供免息分期，什麼都有得供，但李兆波建議理財紀律稍弱，習慣只還min pay的消費者還是一筆過付清比較好，以免墜入過度消費的陷阱。

另一個拍拖迷思，便是拍拖洗費究竟應該AA還是互相分擔。所謂「清官難審」，李兆波認為問題關鍵既在於雙方共識，也在於彼此收入和財務狀況。無論是男方賺得多還是雙方收入均等，男方負擔了主要洗費，女方也宜「識做」，適當時候送上小禮物以表心意，因為一方畀晒容易為關係埋下計時炸彈。

蘇慶輝：預早為情人節儲定彈藥

投資者教育中心傳訊及教育資源經理蘇慶輝亦提醒，信用卡分期付款是透支未來購買力的行為，並不會令消費者荷包多了錢。現今以信用卡消費亦常有優惠，例如指定時間內簽帳滿一定金額可賺取飛行里數亦會容易讓人不自覺地較「疏爽」，因此如想精明善用信用卡優惠，大前提便是本身要有良好的理財習慣。

人工有限，想情人節過得豐富不一定要以碌爆卡悲劇收場，蘇慶輝提議男方不妨預早製定預算、規劃行程，做個「有遠見」的男人，及早為情人節儲定彈藥，便可避免節日食大餐、月尾哽麵包的窘況。加上今年情人節在星期二，與其放工食飯睇戲「交行貨」，不如提早DIY小禮物，慳錢又有心思。

想愛情長長久久，節日充一時「大頭鬼」並非可取之道，兩位專家均建議職場新鮮人以月入的1至2成作儲蓄目標，亦不妨善用手機App幫助規劃日常洗費。畢竟愛情走到最後終要down to earth，不可能日日浪漫食大餐，男女雙方能將理財的態度同步，是讓彼此能走下去的一個重要因素。