【享譽國際】香港入圍「談不起戀愛」城市 拍拖唔知去邊好

撰文:
最後更新日期:

我們都想有個浪漫又有情調的地方談情說愛,但現實環境不容許,戀人們又是如何在城市間尋覓、建造他們的秘密基地?(梁鵬威攝)

+5
+5
+5

德意志銀行(Deutsche Bank's)早前發佈調查,香港入圍「最談不起戀愛」城市,於全球47個城市排第20名、在亞洲排名第二,僅次東京。在香港,兩個人一日的「廉價約會」大約花費863元。

調查以一日交通、set dinner和lunch、戲飛、啤酒及飲品的消費成本計算。計一計,如果兩個人交通費$40、lunch$100、戲飛$220、下午茶飲杯咖啡$80、食200蚊dinner後直落飲啤酒$150,都符合條數。

空間不足、規管過時

喺香港,拍拖真係唔知去邊好。返工咁攰,放假想留喺屋企,但樓價瘋狂、人工追唔上,香港就有超過75% 35歲以下青年與父母同住。想最低消費,帶男女朋友返屋企hea、煮餐飯、一齊瞓個晏覺都成問題,間屋太細甚至冇自己房嘅話,只能迫住出街拍拖。

出街拍拖都可以去唔駛消費嘅地方,例如行山。唔係唔得,但個個星期拍拖都去行山,星期一攰到唔想起身,唔係長遠之計;可以去公園坐,但大多公園都寫明唔准踩草地、唔准瞓低、唔准帶寵物、唔准玩棋類唔准打波乜乜乜,咁即係剩係去坐,有時情不自禁攬攬錫錫又會畀人影低擺上網,市區口袋公園隔離就係高樓,多車多塵.......最後都係去返商場行街睇戲食飯。

租唔起樓自己住,放假唯有去開房,但好多平價賓館近年改做旅客生意,成日要等一兩個鐘先有房,興起想開房都係想即時搞,結果又要等,乜都係土地問題。香港真冇咩地方去,於是「拍拖好去處」、「假日好去處」都會成為熱門搜尋,但當大家嚟嚟去去都係去個幾味,就會唔夠位。開開心心準備食物去大草地野餐,去到就發現周圍都係人、想影張sweet sweet靚相,背景一大堆人頭;去長洲諗住靜下點知仲迫過旺角、食串大魚蛋都要大排長龍。

城市可以有好多可能性,但香港實在太多限制。拍住拖去聽獨立音樂,遇上HA畀警察掃場又拉又鎖;拍開拖個間唐樓cafe飲杯花茶可以坐半日,好正,但因為申請唔到食牌、又唔夠錢搬商廈,下個月被迫執粒;想舒舒服服踩單車,但要去到單車徑咁遠租架車,踩完即日還個種。

事情環環緊扣,「談不起戀愛」唔單止物價貴,仲有太多太死太過時嘅秩序。



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。