【我的情敵女婿 ‧ 有片】MC Jin客串現身　等埋位都有Free Style

葉念琛執導的賀歲片《我的情敵女婿》，從電影海報可見，都有一大堆客串名單，其中就有上年《中國有嘻哈》而大熱的MC Jin。近年忙於在內地掘金的他，要搵佢客串，有心都未必有時間。
由於葉念琛跟他有點交情，所以左度右度下，MC Jin最終抽到一日時間返香港拍攝客串戲份，而搵得佢，當然就要佢Free Style Rap啦。

劇情講到任達華為展現自己無所不能，即使阮兆祥要佢拎當晚的TVB台慶巨獎，佢都話冇問題，於是鏡頭一轉就去到「台慶夜」的舞台上。為營造呢個「台慶夜」，劇組花6位數字搭建一個華麗舞台，但都未夠，點先令人觀眾一眼就睇得出係TVB台慶呢？於是導演就找來金牌司儀鄧梓峰客串一角，有十郎坐陣，你想過ViuTV都唔得啦，而MC Jin就在戲中飾演番自己，做表演嘉賓。

搵MC Jin客串有樣好，你根本唔使度對白俾佢，因為佢已經Rap晒出嚟，而戲中角色正正就係要佢Rap唔停口，搞到主持都覺得煩厭想趕佢走。又其實，現實中的MC Jin真係無時停，無時無刻都在Free Style Rap，文中有兩條片，一條是他等埋位行上舞台的短短45秒，就已經Rap出一段非常公正的Free Style，然後另一片就睇到佢正式Roll機時，一樣Rap到無停嘴，根本係把口快過個腦，咁精彩的表演，真係想睇多啲，希望MC Jin多啲返香港啦！