【大星講】黃秋生獲江湖大佬邀拍爛片 「仲搵前亞姐摸我大髀傾」
ViuTV節目《大星講》繼續有黃秋生，繼上集講雨傘運動後片約斷絕後，今次故事再推前少少，講他拍過的爛片。曾幾何時，秋生哥都拍過不少爛片，原因當然是為搵食，但有趣是他特別吸到江湖客路。黃秋生︰「有啲大哥想找我飲茶，話聽人講我個人得意，想搵我傾下偈。」亦因為咁，令他遇過不少拍爛片的奇遇。
全靠阿嫂甩身
其中有一次，某江湖大佬帶住阿嫂，以及一班穿黑西裝的金毛手下，一圍檯坐低跟秋生食飯談合作。「據知位大佬都好猛下，平時都仲打打殺殺，咁都要俾面出去聽下。」一坐下，就有位「小師爺」般的人出來，跟秋生講劇本。「佢話故事一開始，有個女仔被人強姦，姦完又被第二個姦，之後再有人姦，仲好享受咁。我聽完之後即刻話︰『唔拍得！』」
話說得斬釘截鐵，但此話一出，其身邊手下已經裝兇作勢，看似騎虎難下。幸得秋生夠機警，一個轉身就向大哥身邊的阿嫂埋手。「我走去問阿嫂，你聽我講點解先，你都係女人，一個劇本講到個女人不停俾人強姦仲好開心，係咪好侮辱女性呢？」阿嫂聽到後沒有表示，只跟大佬耳語，大佬聽完就話︰「唔……我哋再度度個故仔先搵你。」就是這樣，秋生憑一個急才成功甩難。「過了一段時間，個大佬仲畀人拘捕添，直頭唔使拍。」
出動到亞姐色誘
除了用強勢壓逼，亦有另一江湖中人用色誘技。「舊時拍戲叫7日鮮，我拍過3日鮮添，3日拍一部。後來某大哥覺得3日拍一部辛苦了我，決定俾夠6日我，拍夠3部！仲出動美人計，搵個前亞洲小姐的師姐著條短裙，一來就摸我大髀話︰『好耐冇見喇，秋生』最後梗係冇拍啦！」
秋生自言爛片不怕拍，因為當中每一場戲都是試驗，好多時拎到劇本就知是否爛，「我都想部部劉德華，但冇咁多導演搵我嘛！」不過他更討厭是不少電影製作人仍不自愛，繼續拍沒水準的作品。「試過有個笑位，我聽個導演講已經覺得唔好笑，然後問個導演，佢話剪埋就好笑。啊！你啲菲林有魔法嘅？而家唔好笑剪埋就會好笑，剪埋唔好笑你就話上咗會好笑，上咗唔好笑你就同老闆講下一部會好笑，咁又真係幾好笑喎。」
秋生更說早在90年代已告誡再拍落去只會死路一條。「成日一個題材得咗，就一窩蜂去拍，鹹戲得就一窩蜂拍，鹹到男人都唔硬，從來只會識一窩蜂，冇想過如何去發展個市場，維繫個空間。」