【賭俠1999】張家輝奠定笑匠之作 「化骨龍」式演繹可一不可再

撰文:
最後更新日期:

20年前今日,電影《賭俠1999》上畫,這部奠定張家輝笑匠地位的作品,令他好一段日子繼續拍下不少爆笑作,例如《化骨龍與千年蟲》、《黑馬王子》、《千王之王2000》等,所以對不少家輝迷嚟講,呢部簡直係熟到識背。

要數呢部最經典對白,頭位相信會是︰「X你個街,亞視嚟嘅喂!」不過另外有一幕,佢用好幾首歌名串成一段對白,去說服朱茵向劉德華(阿King)表白一幕,又係好鬼過癮,你又背唔背得番出嚟呢?

搵到劉德華去扶自己一把,晶哥算好有心。(影片截圖)

「家咩姐,我姓甘」一句成名
1998年的張家輝,迎來人生事業上第一個高峰,因為那年年初播出劇集《天地豪情》,甘量宏(Kelvin)一角搶盡主角大頭文(羅嘉良)風頭,一句︰「家咩姐,我姓甘㗎!」盡顯見錢開眼泯滅人性。人氣咁勁,向來有商業觸覺的王晶當然唔放過佢,立即找他拍電影,仲要跟夥拍劉德華,拎番「賭俠」呢個金漆招牌出嚟拍《賭俠1999》,甚有接班味道。

數年後再演賭俠,白頭佬造型特別有型。(劇照)

戲中飾演老千的劉德華阿King,一次出千斷正,掀起打鬥受傷導致色盲外,更誤殺了煙囪(吳毅將  飾),被判入獄五年。出獄後,巧遇一直崇拜他的賭仔化骨龍(張家輝 飾),經歷過不少次出生入死後,更成師徒跟拍檔,King更與化骨龍妹妹晴(朱茵 飾)交往。之後劇情如何不重要,最重要都係睇張家輝點發揮。

當年的朱茵都係尤物代表。(影片截圖)

朗拿度造型都相當經典。(影片截圖)

一口氣串足8首經典歌名
除咗壓軸扮朗拿度呃馬交文,當然仲有經典對白︰「X你個街,亞視嚟嘅喂!」呢下係好笑,但要數佢扮情深,扮有文化一幕,不得不數他慫恿個妹向阿King表白,當中仲用咗好幾首廣東流行曲歌名串連起來,你又記唔記得有邊幾首?劇情講到個妹見到阿King同佢個仔玩得咁開心,不是味兒。

做阿哥的於是激勵佢︰「你咪成日掛住個青面仔,一於飲杯《忘情水》,唱番首《我活得比你好》,《日出時讓戀愛終結》,睇下白頭佬幾時講《你是我的女人》,大家生番個《笨小孩》,咁咪《你的名字「佢」的姓氏》,咪《愛是永恆》囉,你《總有一天等到「佢」》」一口氣串起8首廣東經典,仲要全部都係劉德華同張學友嘅歌,好懷疑都係張家輝的自選集。

呢幕一氣過勁數一堆歌名,其實幾似佢扮有文化的特色。(影片截圖)

+3
+2


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。