睇E-Kids新MV送iPhone超市禮券? Tommy:其實都幾悲哀

撰文:黃浩晉
出版:更新:

雖然E-Kids沉寂了一段時間,但他們上年舉行演唱會後開始「強勢回歸」,而且有全新派台歌《一二三四》,並將推出MV。早前E-Kids更大鬧旺角同大媽爭位拍MV,今日就於facebook推出製作花絮,叫fans玩「睇MV送iPhone」,Tommy在片中宣佈將會送出兩部iPhone 7、超市禮券500蚊,以及30秒同成員阿Tim郁禮賢濕吻,單單呢段說話已經符合三字「九唔搭八」的形象。

講番新歌《一二三四》,由Tommy負責作曲、監製,少爺占填詞以及日本班底編曲,看來E-Kids這次想「認真做大事」。既然邀請少爺占填詞,而且MV畫面不斷旋轉,似乎E-Kids希望新歌延續「玩嘢味」。Tommy接受《香港01》表示希望今次大家都有「官能刺激」:「睇得晒當你贏!因為我哋3個成14年冇一齊拍MV,想大家一試難忘,而且有『官能刺激』。」

事隔14年,E-Kids終於有新歌同MV喇!

另外被問到,為何歌詞會唔啱音照用,Tommy則表示是自己的堅持:「我作曲嗰時啲音定咗就係咁,到少爺占填完份詞返嚟無論係點都照唱,唔改個旋律。因為廣東歌好少啲詞好密得嚟又以節奏為主嘅快歌,所以今次首歌除咗係對我哋嘅『死亡挑戰』,亦挑戰緊觀眾聽歌嘅底線。」

個MV整到天旋地轉,Tommy話係要挑戰觀眾嘅底線。
一張圖邊feel到有幾天旋地轉,快啲click下面啲圖感受下!(按圖放大)
+10

豪擲20萬去製作新歌加MV,為否嚇怕投資者?Tommy表示:「其實係有可能一鋪搞到投資者打退堂鼓,但係我哋想做得一首得一首,好似Wyman咁講『寧願用10萬蚊買一件衫,好過用1萬蚊買30件衫』,希望今次新歌俾大家見到E-Kids係認真咁造歌!」

Tommy又透露亦曾遇過反對聲音:「都有人同我講覺我做慢歌喺香港先好反應,而且造快歌使嘅錢多好多,但係我就覺得香港已經少跳舞組合,今次出番嚟希望俾人留意到,除咗草蜢之外,香港仲有E-Kids呢個跳舞組合。」

Tommy希望大家可以感受到香港除咗草蜢仲有E-Kids呢個跳舞組合。

除咗製作新歌及MV大灑金錢,E-Kids今日於facebook宣佈豪送兩部iPhone,叫網民玩「睇MV送iPhone」,如此大手筆E-Kids會唔會走數先?Tommy堅定話:「堅送㗎!因為好驚大家唔聽、唔睇個MV。當時開會傾點樣宣傳,見到facebook有post話XO醬都多人Share,咁不如我哋都送禮物俾觀眾啦。至於送iPhone本身係諗住,大下個老闆,點知佢哋又話好!」

Tommy又自嘲:「唔介意你因為iPhone先走嚟聽歌,最緊要你肯聽!不過其實都幾悲哀,到底係MV吸引啲,定係iPhone吸引啲?都係iPhone吸引啫!不過真係好希望大家留意下,唔介意你話MK!」

《一二三四》編曲類似典型舞曲,鼓聲keep住「Four on the Floor」每一下正拍都「Boom Boom Boom」,而且加入大量synthesizer做Hook line,雖然夠搶耳好記,但會否怕讓人有「貨車歌」的感覺?Tommy笑言:「咁我哋MK吖嘛!啱啦!呢個係香港嘅特色吖!啲人話我哋係MK始祖,要有嗰種感覺,唔可以偏離得太遠,哈哈!」

Tommy自嘲E-Kids係「MK」,不過都希望觀眾感受到他們是在認真做音樂。
其實今次個MV都拍得E-Kids三字幾型㗎(按圖放大)
+3