細路女逛超市身體不適 港媽建議隨處嘔 嫌污糟要求超市經理抹乾淨

有超市員工網上爆料，稱日前有港媽帶細路女去超市購物，細路女進食時突然感到身體不適、忽然嘔吐，超市地下滿佈嘔吐物。員工禮貌建議港媽自行清潔，卻被一口反駁「我唔執㗎，我都驚㗎」。事件曝光後，港媽被網民狂鬧性格自私，行徑好過分！

細路女逛超市身體不適 港媽建議隨處嘔 嫌污糟要求超市經理抹乾淨

有超市員工於Facebook專頁「西店Hi客之道 Hispitality Secret」投稿分享，稱日前有港媽將細路女放置在購物車上，一邊推向收銀處排隊付款，當時細路女手持食到一半的菠蘿包，卻神色有異，似乎身體不適，港媽居然建議細路女「你嘔啦，嘔出嚟舒服啲㗎」。

細路女聽到後「一路嘔落地」，而港媽則旁若無人「一邊推架車埋Counter（收銀處）」，單憑文字想像，畫面就好似水泥車一邊行走、一邊傾倒水泥一樣。員工見狀立即向港媽表示「小姐，我比啲紙巾你，你清楚（清潔）返啦」，卻獲回覆「啊！我唔執㗎，我都驚㗎」，情況一度僵持，最後需要出動超市經理親自清潔。

有網民認為超市有權收取清潔費，直接向港媽講明，「清潔費收$500，一係佢自己抺，一係有錢收， 條氣都順啲」，甚至舉出例子「細路女急屎點算？」、「梗係即刻除褲痾啦，痾左出嚟舒服啲㗎」，暗諷港媽做法橫蠻無理。

又有網民笑稱「其實都就嚟去到收銀處，問職員拎個膠袋俾小朋友嘔囉，好過叫小朋友嘔落地啊，我唔信個職員咁都要收你五毫子（政府膠袋徵費）。」，惟按照相關規例，店舖的確有責任向相關人士收取費用。

另一方面，有網民認為該投稿員工「唔識Do」，認為作為員工直接要求客人做清潔的行為，實在不太恰當。