千呼萬喚始出來，全國人大委員長張德江南下訪港，今日終於落機。一連 3 日行程，由會見特區官員開始，再去禮賓府同梁振英食晚飯，聽日去灣仔會展參加「一帶一路高峰論壇」，同立法會議員會面，後日再接見中資、左派人士，更有可能參觀大埔科技園，同埋觀塘公屋地盤。

張委員長上次訪港，已經係 2004 年 6 月。當時因為中方隱瞞「沙士」疫情，導致中港關係異常緊張。張德江時任廣東省委書記，低調啲，搭車由皇崗過關。今時唔同往日，張大委員長而家個 office 喺北京，自然要搭飛機，鋪紅地氈，由特區一眾領導層官員接機洗塵。而新華社嘅新聞稿，話張委員長並唔係平常「訪港」咁簡單，而係「視察」，擺到明「莊閒要分清」。

香港呢幾年社運不斷，「雨傘」、「魚蛋」都驚動到北京領導層。警方明顯怕又出事，嚴陣以待。除咗一連三日封鎖會展「一帶多路」、派出 4,000 警員做委員長「保鏢」、地下路磚「黐膠」、紮營守護獅子山（已失敗，兩次）之外，更要求喺會展附近嘅沙中線地盤停工 4 日。示威區設喺告士打道，莫講話張德江，連會展都見唔到。點解？因為要防範「本土恐怖主義」，所以要採取「反恐保安」措施。

講真，真係畀佢嚇親，之前國家領導人江澤民同埋胡錦濤多次訪港，都冇咁大陣仗。明明 2012 年自習總新班子上台之後，中共中央政治局通過咗「中央八項規定」，其中第 5 項寫到明「堅持有利於聯繫群眾的原則，減少交通管制，一般情況下不得封路、不清場閉館。」今次樣樣做齊，同近幾年國家領導人訪問內地城鄉嘅情況南轅北轍，唔知係咪為咗突顯「一國兩制」呢？

延伸行動： 張委員長訪港 3 日，灣仔返工嘅朋友最開心。全城戒備，乜路都封，大條道理同老細講：「遲到唔關我事，要怪就怪張德江。」想知張德江訪港有乜好睇？密切留意《香港01》即時報導喇！