阿Jim家居沒有煮食爐具，他自己多年不煮，但想不到這次三傻搞作，喚起阿Jim少年記憶。他小時候已經為家人煮餸，可謂經驗豐富。他的刀功了得，處理食材有種令人信服的功架。今次他教大家雞翼去骨，手起刀落，完全不會雞手鴨腳！

為咗呢一味，阿 Jim 朝思暮想，晚晚搜尋 YouTube，終於俾佢諗到一味超班 fusion 菜：中式 risotto 煎釀去骨雞翼！不過一如既往，Jim只係諗到點煮，從未煮過，現場表演，未到最後一刻，都唔知道成功抑或撞板。

先講下佢碟意大利飯如何中式、意式炒埋一碟。

當日大家問佢點煮，佢信心十足：「得㗎啦，生米加上湯一邊煮一邊攪，十五分鐘，攪掂！」Jeffrey 太太 Alby 卻說：「上次妹妹要煮45分鐘喎，你好肯定！？」他肯肯定，話佢係跟足包裝說明！

他的高明與創意之處，在於意式正路之外，加入中式口味。用雙色金華火腿已是一絕，再追加大過手指頭嘅金蠔，浸軟乾瑤柱，全部切成小粒，加入牛油，生炒意大利米，邊攪邊煮邊加湯，直到米煮成飯。

阿 Jim 喜怒哀樂形於色，是個爽直的麻甩佬。由於從未煮過 risotto，而且第一次煮就越級挑戰，大膽加入中式材料，佢本來自信心爆棚，但煮了十幾分鐘，米還未熟，白白實實，他就面有難色，囉囉攣，忐忑心情溢於言表。

呢個就係性格鮮明嘅阿 Jim！記得他帶我第一次踩越野單車，竟然不理本人死活，不走大欖水塘的初級車道，越級到大帽山的髮夾路──  一起步踩山車，面前就係又窄又斜的「之」字車道，嚇得我面青口唇白。最後有驚有險，直到終點。正如今次金華火腿意大利飯，也是有驚有喜，攪到米煮成飯，創新一味非常 risotto，我們一口咬下去，蠔味濃郁，意飯吸收精華，煙煙勒勒，阿 Jim 一擊即中紅心！

把意大利飯釀於去骨的雞中翼，然後用野外 cook set 煎香，上碟時雞翼香噴噴、脹卜卜，刀切下去，清楚看見雞肉包緊意飯，吃下去味道豐富，圓潤地包含了中式和意式，製作過程多姿多彩，味覺上細緻豐富，層次複雜，又自成一家。

三個傻佬實驗食譜

↓↓材 料↓↓

雞中翼　　　八隻生曬蠔　　　三隻瑤柱　　　　三粒金華火腿　　三小片蘑菇　　　　十粒洋蔥　　　　一個意大利米　　四安士清湯　　　　十安士高溫檻㰖油　適量牛油　　　　適量鹽　　　　　少許芝士粉　　　適量黑椒粒　　　少許

↓↓做 法↓↓

1.　雞翼去骨，用少許鹽，檸檬汁少許、白酒醃半小時；2.　蠔豉、瑤柱用少量開水浸四小時至軟，切小粒（5mm）左右。水不要倒，備用。3.　蘑菇切成小片，洋蔥切小粒。4.　燒熱煱，加入檻㰖油及牛油，放入洋蔥碎炒至金黃色，中火加入意大利米攪拌。5.　米粒要充分上油，加入先前浸泡瑤柱的水繼續攪拌，見米開始吸收水分，加入全部配料，分別用每兩安士清湯加入米中慢攪拌，十五至二十分鐘左右見飯成，熄火加入芝士粉。6.　將飯釀入雞翼，頭尾用牙籤穿起，用慢火煎至金黃即成，吃時可點上松露醬或芥末醬。

（本文純屬作者意見，不代表香港01立場。所有圖片由作者提供。）