阿Jim家冇焗爐，如何煮鵪鶉？家裏剛巧有幾片荷葉，已放在櫃桶底年多，靈機一觸，不如荷葉蒸，把想法Whatsapp出嚟，怎料被阿Jim笑到面黃，「你咁整法，滴汗呀腦細，不如叫做咆哮鵪鶉啦」！

在家一試無妨。蒸出來上碟，賣相奇差，荷葉頹到冇朋友，霉叠叠。鵪鶉焗出爐，金黃色香噴噴；蒸出來就，外皮灰灰沉沉，生意失敗咁嘅死樣。老婆Louisa話，唉，你都係咪整，無謂獻世。

我本來已經放棄。但後來阿 Jim 話，網絡太多西式食譜，我哋應該追尋上一代的中式古法。Louisa 又附和，家常菜集很多中國人的智慧，只不過大家都喜歡「潮物」，中式煮法被視作老土，大多只係保留於尋常百姓的廚房。我看見他們的短訊，馬上立定心意，無論有幾樣衰，一於做一味荷葉鵪鶉！

醃製沿用法式，用 lemon zest 及肉桂粉做 base，醃法可參考上集《法國食材中式演繹——洋蔥煀鵪鶉！》。

荷葉的部分，我想起中式的糯米雞、荷葉飯、鹹肉粽，於是決定加入紅腰豆、鷹嘴豆，取其綿軟粉柔，與鵪鶉肉的重口味可作對比；而紅腰豆的紅色，可以沖淡蒸煮外皮的頹唐賣相。

先將紅腰豆、鷹嘴豆浸水一小時（亦可用罐頭裝就不必浸水）。然後小火煮至軟綿。在豆中加入一大束蒜頭，最好選用法國白蒜，味道更濃。煮半小時至一小時之後，攤凍，然後將蒜泥壓出來，混入豆中，蒜皮棄掉。

荷葉也要先浸水半小時，然後蒸軟才可摺叠。

到 Jim 家那天，見 Jim 實驗一碟中式意大利飯，用上了金華火腿、金蠔切碎煮飯，香氣四溢，口味中式拼意式，我就臨時借用，與紅腰豆、鷹嘴豆混合 Jim's risotto，放在荷葉上，再用鵪鶉「擁抱」豆飯，包起荷葉，用牙籤封口，蒸 20 分鐘。

上碟之時我本來抱實驗心態，預咗失敗。怎料荷香優美，肉汁下滲豆與飯，一口咬下去，真係好滋味。中式法式意式，文化匯通而沒有衝突，perfect！

三個傻佬實驗食譜

１.　鵪鶉兩雙醃過夜

醃料：肉桂粉、檸皮茸、欖油、豉油、百里香

２.　荷葉蒸

荷葉浸水後蒸軟，包入預先煮至軟綿的腰豆及鷹嘴豆（可另加糯米飯或十穀飯），蒸 20 分鐘。

（本文純屬作者意見，不代表香港01立場。）