張敬軒「找數」化身南非騎師「麥偉利」 騎住愛駒dahlia旺角送碟
撰文：溫菁莉
出版：更新：
一向諗頭多多嘅張敬軒，早前透露過2018年是他的「找數年」，而第一條街數就是推出廣東碟同國語碟，仲話要將啲燒陶瓷碟燒俾fans，不過名額只得十五個。軒仔日前在Facebook宣佈點樣可以得到佢嘅碟：「留言寫出張敬軒嘅三個優點，並加以說明。」軒仔仲話會親自挑選幸運兒粉絲！！但粉絲又點會咁容易拎到碟呢，軒仔今次就化身成送碟專員約好一班粉絲得獎fans去麥花臣球場搵「麥先生」，佢會拎住個紅白藍出現。粉絲聽完當然即刻去，點知就遇到麥包（麥長青）又拎住個紅白藍出現，究竟係搞乜呢？
軒仔同愛駒dahlia感情好好。
+6
於是fans們就衝向麥包問佢攞碟，但麥包話：「咩呀？我都唔知喎，我都係嚟攞碟㗎喎。」等咗一陣，軒仔化身為一直被網民話同佢撞樣嘅南非騎師「麥先生」麥偉利，仲「騎住馬」出場𠻹，十分搞笑。fans見到梗係又驚喜又笑死啦，最後軒仔都有送番隻碟俾真嘅麥先生麥包𠻹㗎。事後軒仔大呼好玩，喺超多fans讚佢嘅留言入面，軒仔最有印象就係：「我記得有一個係話『你腳毛毛多唔怕俾蚊咬，因為啲蚊想咬你已經俾啲腳毛kick住窒息死。』同埋『數口精，咁多條數要找，走數最實際。』啲留言真係好好笑，同埋佢哋真係好有創意。」
一班粉絲可以同軒仔一齊拉頭馬。
原來今次化身麥偉利背後亦有原因，軒仔就話：「因為自從扮過Emma Watson後，好多人都話我似麥偉利。今次送碟俾fans，我就想用一個特別啲嘅方法，於是就扮麥偉利啦。」雖然係扮嘢，但軒仔都好有heart，由神情至裝扮都落足心機，一絲不苟，「隻馬係喺網上面買番嚟，套衫係特別喺英國訂番嚟㗎，哈哈。送碟前一晚有喺屋企練過，特係麥偉利嘅笑容，同埋佢嘅『ok』signature動作，最緊要係策騎動作。」