【開心速遞】呂慧儀囝囝開始一言九鼎 阿蟹：要欣賞小朋友創意
撰文：冼燕珊
出版：更新：
有個幸福家庭的呂慧儀（阿蟹），今日出席《愛・回家之開心速遞》宣傳活動，講到就嚟父親節，佢話佢屋企好重視呢個節日：「爸爸係一家之主，所以佢嘅節日要大肆慶祝，我幾個月之前已經催眠阿仔，我話父親節所有爸爸都大晒㗎喇，叫佢氹多啲Daddy。」
阿蟹同囝囝講，父親節嗰日爸爸最大，要孝順爸爸。（葉志明攝）
阿蟹真係一個好老婆，黃文迪娶到阿蟹真係好幸福，佢仲話每年都會同囝囝一齊準備小手工畀老公。囝囝依家三歲，阿蟹話佢進入一個每事問嘅階段：「佢每日都問點解點解，一言九鼎，你同佢講一句，佢頂你九句，例如問佢點解要畫到份功課花晒，佢話：『無得解，媽咪你再問我點解吖。』我問佢點解要油呢隻顏色，佢話：『無得解。』哈哈，成日鋪個水氹畀我踩。」雖然聽落激氣，不過阿蟹作為新世代嘅父母，就好樂觀面對仔仔成長嘅轉變：「呢個世代嘅父母，對於小朋友嘅每一件事都應該抱住欣賞嘅態度，其實佢好有創意。」
雖然阿仔開始識駁咀，但阿蟹就讚仔仔有創意，佢認為父母要識得欣賞小朋友。（葉志明攝）
阿蟹喺現實中家庭美滿，但在劇中卻係落單嗰個，不過佢就透露嚟緊會有感情線，佢話：「我將會有一段神秘戀情，所以大家要密切留意。」
阿蟹透露熊若水將在《開心速遞》中發展新戀情。（葉志明攝）
【開心速遞】KC、Helen同John將陷三角戀？ Terry今次都唔幫舅父【開心速遞】朱凌凌Miss Tong未拍拖先咀咀 吳偉豪獻出熒幕初吻【開心速遞】陳偉琪一拖三遊泰攰到爆 細龍太真人原來好有愛【開心速遞】周嘉洛希望挑戰高難度角色：會演得開心啲同享受啲【開心速遞】周嘉洛對鏡練演技 演金城安向黎耀祥偷師
+3