疑因蔡思貝與許廷鏗感情不再 胡鴻鈞直認：唔會好似以前咁
撰文：吳子生
出版：更新：
胡鴻鈞（Hubert）自從傳出與蔡思貝暗撻之後，他與許廷鏗密友關係變得決裂，而早前許廷鏗出席活動時直認彼此少聯絡，又稱對方沒有回覆他短訊，大玩失蹤令人費解。Hubert今日（11/5）現身電台宣傳新歌《凡人不懂愛》，直認玩自我隔離政策，又指所有人的短訊都不會回覆，「其實我想俾多啲時間空間自己諗下嘢，特別呢段疫情日子裡，好想善用呢段時間，思考一下將來嘅方向係點，所以得而且確少咗見好多朋友。」
胡鴻鈞承認玩自我隔離，所以沒有回覆許廷鏗短訊。（梁碧玲攝）
（是否沒有聯絡許廷鏗？）Hubert表示：「其實一路都有間唔中都會去關心大家嘅，但就唔會好似以前咁成日見，宜家的而且確係見少咗，連我身邊嘅人都見少咗，咁所以我同許廷鏗嘅關係依然都係好朋友，喺呢一行我冇乜敵人嘅！」（許廷鏗上星期生日有否送上祝福？）Hubert沒有正面回答，反而有所回避話：「我知佢生日，一定會收好多唔同朋友嘅祝福，亦見到鄭欣宜同佢哋開生日Live，所以佢生日都應該過得好開心。」
對於有否直接向許廷鏗送上生日祝福語，胡鴻鈞就沒有正面回答。（梁碧玲攝）