甘比訪問|人生如針織無需補針  日睡最多4小時︰瞓覺係嘥時間!

撰文:黃文琪
出版:更新:

華置CEO、「大劉」劉鑾雄太太甘比(陳凱韻)近日推出自家針織時裝品牌 KUUKee ,大收旺場。如果說其設計的作品講究「手作溫度」,甘比看自己的人生,也像一件一針一線織成的針織品。

由基層記者到華置CEO、香港女富豪,再到針織好手、時裝品牌創辦人,她接受《香港01》訪問時說,每一個階段都很享受,自然而為,「唔需要補針,因為過咗去你點補都冇用;呢一刻我會補針﹙的話﹚,就係再勤力啲!」對於今時今日的成功,她直言無法解釋,但會將「勤力」放在最前;談作息,她坦言目前每天只睡2至4小時,因為「覺得瞓覺係嘥時間」。而說到底還是那句:「冇勤力你就咩都唔得!」

基層記者做起,做過娛樂版,訪問過不同的人;後來做生意,再到今日創立品牌。甘比自言勤力很重要。(梁鵬威攝)

甘比的人生軌跡,並非一開始就寫好劇本。她由基層記者做起,做過娛樂版,訪問過不同的人;後來做生意,再到今日創立品牌。甘比形容這條路「好順暢,又唔係特登安排,人生就係咁樣行,所以我好自然咁做咗。」一切順其自然,猶如巧手針織。她看人生,也像一件針織品——過去的一針一線改不了,能夠「補」的,只有當下。

人生如針織  過去無法補針

這份手作溫度,也讓她回頭看自己的人生像一件針織品。被問到哪一部分最滿意、哪一部分要補針,她說:「每一part我都好enjoy,以前做記者又好,跟住做生意、做品牌,每一個moment都好enjoy、好開心,唔需要『補針』!﹙因為﹚過咗去你點補都冇用,而呢一刻,我會補針就係再勤力啲。future﹙將來﹚嘅話,可能講得太早。」

講到過去,記者生涯是甘比口中難得「Lucky」的養分。(梁鵬威攝)

記者生涯最Lucky 學會被拒絕不洩氣

講到過去,記者生涯是她口中難得「Lucky」的養分。對於由基層到今天的經歷是否很多姿多彩,甘比說:「每個人人生經歷唔同,咁啱我嘅經歷就係由基層做記者,去做生意,跟住做呢啲嘢。其實我好順暢,又唔係特登安排,人生就係咁樣行,所以我好自然咁做咗。」

回望記者生涯,她說得著很多:「做記者嗰幾年學到好多嘢,識到被人拒絕、唔好洩氣、要堅持。以前訪問對象有好多唔同,雖然嗰陣做娛樂版,但接觸到財經、港聞嘅人,我係lucky嘅,遇到好多唔同嘅人,喺唔同人身上學識好多嘢。」她亦感慨,以前做記者很好玩,但若今時今日做記者會有距離和限制,很多事不能真正體會。

甘比訪問|手袋常備辣椒油?華置CEO創KUUKee 安全感一件衫搞掂

甘比感慨,以前做記者很好玩,可接觸不同的人和事,但現在很多事不能真正體會。(梁鵬威攝)

成功兩個字 「冇勤力咩都唔得」

也正因為走過被拒絕的日子,她談成功時將「勤力」放在最前。甘比稱:「對於成功,我會用lucky嚟形容,因為我解釋唔到;但成功因素就係有勤力。雖然好多人講勤力就有用咩?勤力未必得,但係你冇勤力就咩都唔得!」

她強調,不覺得現時自己去了另一個世界或另一個身份,「我始終係我自己,都係一個好勤力嘅人,繼續做每一日要做嘅嘢。我喺屋企都鍾意執嘢,工人姐姐係Helper,幫你手做嘢,但你自己做到嘅嘢都係自己做。助手唔係要幫我拎好多,我成日都幫佢哋手,我覺得應該互相幫忙。」同樣地,她認為做品牌需要耐性,這是性格使然,「自己本身都勤力」。

甘比透露自己每天只睡2至4小時,認為瞓覺「係嘥時間」。(梁鵬威攝)

日瞓2至4小時 「瞓覺係嘥時間」

此外,成功人士似乎都「戒掉」睡眠,她透露,自己每天只睡2至4小時,「我唔係好瞓覺,因為我唔鍾意瞓覺,覺得瞓覺係嘥時間。所以啲時間好見使、好好用。不過,呢個係暫時嘅生活狀態,可能遲啲下年你訪問我,我要瞓10個鐘先得。」一日時間分配方面,她堅持接送小朋友返學、放學,中間回公司做每日要做的事,其餘時間自己再分配。

睡眠以外,她對「身份」也看得簡單。雖然外界常以華置CEO、品牌創辦人、「大劉」劉鑾雄太太等標籤看她,但她強調自己始終是同一個人:在家會執嘢,助手忙時會幫手,能做到的事不會因「老闆」身份而假手於人。這份互相幫忙的日常,與其說是管理哲學,不如說是她口中的性格使然——勤力、耐性、唔怕做。

由記者到CEO,甘比指自己始終是同一個人,並不會因「老闆」身份而假手於人。(梁鵬威攝)

人生順住做 非刻意安排

談到未來事業與生活方向,甘比強調很多事都是「順住做」,並非刻意安排。她解釋,創立KUUKee也非一早規劃,「因為我覺得自己好似工廠咁頂唔住,不如將啲idea去做一個牌子」。

對於往後發展,她沒有設定宏大藍圖,只抱持順勢而為的態度,「handle到就繼續做多啲,handle唔到我咪繼續將現有嘅嘢做得更好。」在她看來,與其刻意追逐下一步,不如先將手頭上的事做好,待能力和時間許可,再逐步擴展。

由記者生涯學識被拒絕、不洩氣,到今日「日瞓2至4個鐘」仍親力親為,甘比口中的「Lucky」背後,始終離不開「勤力」兩個字。她看人生如針織,過去「補唔返」,現在就補勤力;未來呢?她沒有急着織出宏圖,只繼續順住做,handle到就做多啲,handle唔到就把現有的做得更好。這件針織品,大概還會一針一線織下去。