【武漢肺炎】行山避疫成熱潮 山友鬧爆缺德市民蒲台島遺遍地垃圾

撰文:安祖娜
出版:更新:

新型冠狀病毒令港人如臨大敵,人人也用盡方法保持身體健康,不少人近日就選擇行山,希望吸收到新鮮空氣。不過有行山人士發現,有缺德市民遠足露營時非常「無品」,於山邊留下大批垃圾,狠批他們毫不愛惜大自然,「識玩識食唔識執垃圾」。

有行山人士發現,有缺德市民到蒲台島遠足露營時留下大批垃圾,狠批非常無品。(fb群組「香港行山遠足之友(吹水山谷)」圖片)

下載「香港01App ,即睇城中熱話:https://hk01.app.link/qIZYuEC5LO

為了抗疫,市民每日外出都要戴上口罩自保,因此不少人近日選擇到郊外親親大自然,呼吸新鮮空氣,不過有行山人士卻發現令人憤怒的一幕,有山友於facebook群組「香港行山遠足之友(吹水山谷)」發文,指周末到蒲台島行山時,於山邊發現有人露營後留下大批垃圾,批評情況相當無品兼不尊重大自然。

↓有市民行山時發現大量口罩隨處被丟棄↓

樓主上載的相片可見,蒲台島山邊一處對着海的平地留下大批垃圾,包括餐具、食物包裝、水樽及已吹爛的帳幕,似是有人露營後沒有收拾便離開。而垃圾旁邊的石頭及草地亦有焦黑痕迹,疑似曾有人於該處生火。

帖文引來不少行山人士「派嬲」,直指留下垃圾的人毫無公德心,「自己垃圾自己帶走真係咁難?」、「太過份,識玩識食唔識執垃圾?這批人比垃圾更垃圾」、「行山露營都係想接近大自然,遠離煩囂鬧市煙塵撲撲的地方,最後一個後花園都咁對待」。

另有網民揶揄指,相關市民帶走所有貴重物品,只留下煮食工具及垃圾猶如「趕住走難」,「筷子、鑊鏟都唔攞,似緊急逃走多啲喎」、「似係走難多啲,帶晒貴重財物走,未有時間返去跟手尾」。