見工求職面試陷阱 4條問題愈大路愈易答錯 失分隨時與星座有關

撰文:詩寧
出版:更新:

唔少同事/朋友都會「想轉工但怕見工」,結果拖下一年、拖下又一年,越唔鼓起勇氣見工,只會越拖越唔敢做。除非你已經打算做而家份工直到退休,否則間中見下工係有益處的,可以知道外面缺咩人才、其他管理層點睇你現有經驗等等。

面試嘅方式有好多,但面試問嘅問題離唔開以下基本料,準備見工嘅你不妨參考下。

撰文:詩寧

【點圖即看】常見見工問題,你又知道如何應對嗎?==>

第一類:了解求職者工作經驗嘅問題

「過去嘅工作經驗中,你最引以為豪係咩Project?」

須知道,職場上好多同事有十年八年經驗,事實只係「坐咗十年八年」,並非真係有為公司帶嚟貢獻。以上問題係問緊:「你有咩代表作?」。「代表作」唔一要驚天地泣鬼神,但要畀人感覺到你對工作有幾投入,係清楚知道自己過去幾年做過乜,答嘅時候記得要重點提自己喺Project入面擔當咩角色,小薯唔緊要,小薯點配合上司?點同其他同事Team Work?

例如講下單Project有咩難度?你點解決困難?又或者幫公司建立過咩新客源之類,只要表達到你喺公司入面唔係好似傢俬咁得個擺字就得。

(《我們與惡的距離》劇照)

「你認為自己喺工作上有咩不足?」

對於呢條問題,答咩都好,但一定唔好答「冇」。無論幾高級嘅人都唔會「從來無錯過」又或者「冇不足」。答嘅時候態度要誠懇、避重就輕,例如:「平時少去應酬,令到人脈唔夠廣,未來我打算參加多啲商會舉辦嘅活動……」

承認完自己不足之處,最尾記得加埋解決方法,令人覺得你真係有自我檢討,而唔係「我係咁樣,冇得改」。一個人連自身問題都解決唔到,點令人相信你能幫公司解難呢?

(《請輸入檢索詞WWW》劇照)

第二類:睇下求職者有冇誠意嘅問題

「你對我哋公司有咩認識?」/「你對我哋而家做緊個XXX campaign有咩意見?」

咁問係想知你係咪真係有誠意加入呢間公司,定只係漁翁撒網周圍Send CV、有得見咪見下囉?我個人認為,有時急搵工,漁翁撒網唔緊要。但一般由收到電話到約見都有一兩日時間,應該把握嗰一兩日睇熟公司網頁、睇下最近有咩Project做緊、甚至諗下如果個Project由你負責,你會點樣做?有咩可改善嘅地方?

話晒你未係公司員工,就算答錯咗少少背景資料都冇人會怪你,最重要係顯示你有了解過、分析過,否則請咗你發現雙方了解唔夠,結合只係源於一場誤會……即係公司又要再請過人,好煩架。

(《請輸入檢索詞WWW》劇照)

第三類:性格決定命運嘅問題

「工作以外,你平時有咩興趣?」

對方問嘅時候笑笑口,你唔好天真到以為佢真係關心你,唔少HR會以「星座」、「九型人格」之類去估求職者性格,而「興趣」當然亦係睇一個人性格嘅方法,答咩好?唔知道,有人覺得「鐘意化妝」係「尊重自己同場合」;同時有人覺得係「花瓶發姣」。

我哋無辦法控制接收者睇法,但你要清楚講出自己有咩興趣同原因,顯示你係了解自己、知道自己想點。

(《白色強人》劇照)