生意失敗轉戰上海街賣性玩具12年　「係一份職業，有乜好怕醜」

油麻地有一處由廟街、上海街和街市街交織出的夜市，這一帶的檔口在黃昏後相繼亮起燈泡。當附近的商場徐徐關燈，拉上鐵閘，小販們才精神奕奕地迎接自己的黃金時間。這裏有人占卜星相，有人賣迷你電風扇、電話殼、「珠耳盛」等等，但最為人印象深刻的，想必是性玩具檔口－－將一支支形狀、粗幼、顏色不同的假陽具拆開，放在檔口最顯眼之處吸引途人。

除了新年、刮颱風或紅雨黑雨，呂先生一年350多日都會擺檔，由下午三點半至晚上十二點半看著大街熙來攘往，「日頭瞓覺，夜晚返工，輕輕鬆鬆又放工！」他大笑時會擠出一雙彎彎的月牙眼。他說，來買玩具的人大多目標明確，要刺激、要情趣、要「真實感」，拿起獵物付錢就走人，乾淨俐落。自2005年在大街擺賣玩具，身後掛著一排一排性感絲襪，他自稱從來沒有半絲尷尬，就像婦科醫生看病一樣，賣衫賣鞋賣性玩具賣身都是一種職業，無分貴賤，「唔通男人做婦科醫生話『呀，我怕醜』，唏，都係一份職業，有乜好怕醜。諗通咗就得，你又係人我又係人，個個男人女人都打直生㗎啦，唔通打橫生。」

「廟街買嘢快、靚、正」

每次經過這裏也不禁暗忖，真的有人來這買性玩具嗎？現今世代，情趣用品網店應有盡有，也有不少樓上新式商店賣新潮的歐洲貨，有些震蛋看上去像鏈墜，既美觀又不會尷尬，還需要在大街大巷買如此私密的玩具嗎？記者苦求了數檔性玩具檔主，全都耍手擰頭，又或閉目養神當我透明。唯獨是呂生，先是瞇起眼睛笑著拒絕：「你去問啲尊貴人物啦，前面𠴱啲識睇相，唔好問我。」我見呂生欲拒還迎，於是打蛇隨棍上「賴死唔走」，呂生先是大笑三聲，再說只讓我問四條問題，我立即「𦧲飯應」！（無賴的記者當然不只問四條）

問題一：何以選擇日曬雨淋，在上海街賣性玩具？

60歲的呂生喜以傳統廣東話的腔調說話，聲音洪壯、抑揚頓挫、起伏有致，他邊說邊用手比劃著：「人呢，適者生存，為口奔馳，生意失敗，幾十歲冇人請，咪焗住擺街邊囉！人呢，唔怕辛苦總有出路，捱咗十年，仔大女大，夠就得。好喇，下一個問題！」

問題二：做什麼生意而失敗？

「之前喺香港做（針織）製衣批發，沙士前喺東莞有廠，有500幾個員工㗎。2003年有沙士，經濟好差，啲廠執哂。做製衣𠴱時，我啲貨成條廟街都有，廟街有個賣衫嘅朋友爛賭，爭我（貨）錢，就叫佢畀個檔口我囉，擺吓擺吓就擺到𠵱家。仲有咩問？」

問題三：這一帶林林總總貨色都有，何以選擇性玩具？

「適者生存，成人用品古今中外都有需要，冇淡旺季同春夏秋冬之分，ok？清晰呀嘛？100年後，100年前都要，製衣要換季呀嘛！」他再仰天大笑三聲「哈！哈！哈！」，續說：「製衣又要冬天衫、夏天衫，今年輕緊身呀、窄身呀，咩顏色呀好煩。（記：性玩具都有潮流喎？）萬變不離其宗，都係差不多形狀，只係質地唔同，同轉一轉頻道（來貨源地）。就算08年（金融危機）都冇乜影響。（記：中途「出家」，你點識入貨、sell客？）人到中年唔使人教啦，自己都係人，諗吓就識！最後一個問題！」

問題四：上網買可以靜雞雞冇人知，樓上舖又可以慢慢揀，何以要來街邊買？

「百貨應百客啫，𠵱度買完即走，埋嚟問『邊樣最靚』，買完畀錢就走。淘寶要寄要時間。呢度有八、九檔，仲好啦，有競爭，係人都知廟街有呢啲賣。好似買鹹魚要去西環，買電器去鴨寮街咁，睇相、買古靈精怪嘢就去廟街，一諗起就去。（記：什麼人會買哪類情趣用品？）棒呢啲就多50幾歲嘅婦人買，人有需要嘛，要實在啲；震蛋可能力水差啲，後生就多買震蛋；彎嗰啲（即可以屈曲的假陽具，兩邊盡頭都有陰莖）就畀專業人士用嘅 。（記：即是同性戀？）唔好咁講，叫專業人士啦。好喇，夠喇！」

問多一條......這些年來香港人對性的態度有轉變嗎？

「中國人傳統鍾意男上女下，𠵱家唔係啦，調轉啦，花式多咗，多咗情趣。（你怎知來買的情侶不是男上女下？）睇個牌頭就知，我識睇相，幫埋客睇相，擇埋日結婚，我有本通勝㗎嘛，你當我流㗎？（我的相如何？）眉清目秀，旺夫呀！最值錢就呢啲喇！好喇，完喇完喇，我收工喇！」