【果欄‧黃浩然‧專訪二】令老婆難受:我唔識去pick up家庭生活

撰文:
最後更新日期:

黃浩然跟老婆莫家嘉相識於2002年拍攝《新紮師妹》的時候,相信大家對黃浩然劍雄的形象相當有記憶,一套戲令他開始打響名堂並認識了後來的老婆。拍拖3年後便成婚,直到今時今日已經一起走過了16個年頭,還育有了兩名兒仔,但原來黃浩然亦曾經因為只顧工作忽略了家庭,大囝出生的頭三年跟他彷如陌生人,因為一個病終於令他重新投入家庭。

而家一家親好融洽,原來當年爭咁遠。(Facebook圖片)

黃浩然當初拍攝《新紮師妹》跟老婆相識,其實老婆並不是劇中的角色,他說:「佢係服指(服裝指導),好自然地開工就走埋一齊,嗰陣時我又無拍拖,其實我係識我太太舅父在先,大家成日都話約埋出嚟,講就講咗好耐喇,你估幾廿年前相體咩,最終其實係無咗件事。後尾拍《新》就慢慢一齊咗,無咩特別㗎,開工焗住困獸鬥講吓嘢,收工我又主動約吓食飯飲吓嘢,好自然地真係,又無乜強烈強勢。其實咁大個人大家都會feel到嘅,亦都係feel到有啲可能性先會再進一步。」所以話緣份幾重要,學現在時下流行的佛系講法,緣份到了,自然會在一起。

佢同老婆周不時都會放吓閃。(Facebook圖片)

究竟一個演員同一個服指是如何走在一起呢?浩然在訪問中多次提及「自然」兩個字,真的是十分佛系,他說:「我諗識咗四、五個月就一齊,我哋呢行好奇怪,開一套劇連阿媽都唔會見,剩係見住嗰班人。即係我拍《果欄中的江湖大嫂》見香香仲見多過我老婆,我諗我同老婆開始了解就係拍《新》呢段時間,咁唔係兩個人嘅,係一班人,從中都會了解到大家。而佢亦都話過我知,我做嘢嗰陣係最吸引。」

佛系浩然要登場喇。(陳順禎攝)

+5
+4
+3

相處十多年,途中除了甜蜜,當然也會有爭執的場面,不過浩然自己認為一個男人,有所為亦有所不為,所以即使嘈交亦不會動手動腳。我又唔算係一個好爆嘅人,但好多時一啲言語間會傷害到對方,可能係粗聲粗氣,又可能係返到屋企一粒聲都唔講,因為好多時我哋喺工作上已經講晒所有嘢,返到屋企就會乜都唔想講。」

浩然話男人一定唔可以郁手打女人。(陳順禎攝)

浩然亦坦承自己對著太太也會爆粗,不過對象並不是太太,「因為我覺得男人有啲嘢係唔做得,打女人或者用粗口去問候,一定有問題。其實佢都會好體諒我,但十次都會有一兩次佢會爆我,有時有啲事只係好少事,但係愈親嘅人愈少嘅事就愈唔理。例如啲囝以前學校有乜,我係唔會上心,但而家電話除咗自己嘅嘢,仲會mark埋屋企人嘅嘢。」他認為自從病完後有另一個體會,以前的黃浩然人生就是工作工作再工作,現在除了事業,還需要家庭。

一場大病,令他意識到家庭的重要。(陳順禎攝)

因為過往太沉迷工作,浩然基本上是忽略了家庭,最誇張的是,原來他跟兒子陌生的程度可以是這樣大,他說:「其實第一個仔,出世三年我係唔識佢咁濟,抱都唔識抱,咁樣係會令到另一半幾難受,因為我唔識得去pick up返家庭生活,其實係幾可悲。啲人成日話放3日假俾你陪吓屋企,其實係唔得嘅,當你有一年時間唔喺屋企,可能你要用一個月時間去pick up返個心情同情緒去面對屋企。又或者我放到屋企,就會攤咗喺梳化到望住個電視發呆,你會覺得除咗做嘢,其他嘢都唔重要。」現在的他懂得抽時間去陪家人,見他們不時也會有合照放上網,一家人樂也融融。

而家好多sweet嘢。(Facebook圖片)

除了一家人出去玩,教囝當然也是一個加強關係的渠道,但這樣東西最難掌握,很容易便會變成時下的「怪獸家長」。他表示:「香港教育制度係辛苦,但自己亦都咁諗,家長唔叫個仔去寫字,佢緊係揀玩喇,所以其實都好矛盾,唯有自己揀個中間位。我老婆都係同佢玩多,相對地希望佢快樂,當然我啲囝係驚我多啲,我同阿媽同會鬧佢,但唔係同一種。而家做父母好難,我同太太都係不停學習,唯有睇多啲書,最慘係我哋上一代嘅做法係唔啱我哋,佢哋係嚴到不得了,而家又唔適合。」

【果欄‧黃浩然‧專訪一】因為患病令他轉變:以前我係唔注重休息

【果欄‧黃浩然‧專訪三】緋聞絕緣體:就算攬住都唔會覺得有企圖

盡力令自己唔好成為怪獸家長。(陳順禎攝)

「究竟你點樣去培養小朋友呢?唔俾佢學嘢又驚佢追唔上,俾佢學又怕變怪獸家長,唔迫佢做功課緊係玩喇,可能你叫咗佢3粒鐘佢都唔做功課,直到你鬧佢。睇你點引導佢囉,做功課嘅過程發掘啲開心嘢,而家細路仔功課真係好難,數學一年班都真係幾深,我都會同太太一齊pick up。」教囝從來都不容易,太過強硬會令人討厭,太過放鬆又怕他被社會淘汰,如何做一個滿分家長確實要時間去學習,希望浩然可以在工作和家庭中取得比衝,一來帶到歡樂給觀眾,二來可以令兩位囝囝快樂中成長。

希望浩然可以取得一個平衡。(陳順禎攝)



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。