【果欄‧黃浩然‧專訪三】緋聞絕緣體：就算攬住都唔會覺得有企圖
黃浩然給人的感覺是一位好好先生，多年來除了對老婆好之外，亦甚少跟其他女星傳出緋聞，連他自己也直言即使攬著其他女生，也不會令人想到去另一邊，究竟是甚麼魔力令他變成這樣呢？而當年劇接劇的時候，有好多網民都覺得經常看到他出現，會有些厭悶，黃浩然更說當時他拍得很「夾硬」，直情拍到不想再拍，因為一場病後亦令他有所改變。
黃浩然拍劇多年，遇過不少女對手，但他有別於其他人，甚少有黃浩然的緋聞傳出來，簡直是一個「緋聞絕緣體」。對於這個說法，他有一套見解：「其實我覺得，即係我有過咁多女對手，就算我而家喺街攬住佢，你唔會覺得係嗰樣嘢，就算香香又好，Grace又好，我攬住佢好係自然係朋友嗰種感覺，大家唔會覺得我有任何企圖。其實係一件好難嘅事，例如你拍嘢，你要俾到女對手嘅感覺係好舒服，但其實嗰樣嘢係假㗎喎，因為佢唔係真係你老婆或者女朋友，咁先得到對方嘅信任先有火花，係難嘅。同埋我諗我係企得幾硬嘅，大家知道唔係嗰樣就應該幾難，其實係大家想唔想古怪係大家會知嘅。」其實大家都知浩然對老婆幾咁好，想埋身都唔係咁容易。
講起他遇過的女對手，在網上的世界，他跟黃翠如是獲得很多好評的，一套師父·明白了，一套《愛我請留言》，兩套都是令人拍晒手掌的劇集。究竟兩人會否再次合作呢？他說：「翠如同我係好有默契，但有時太過有默契就會喺一個舒適圈入面，到時就會諗會唔會有新嘢呢？有時拍得太多就要停一停，好似Andy（陳耀全）咁，其實《平安谷之詭谷傳說》之前我係好耐無同佢合作，大家各有各出面拍其他嘢，到呢次再合作出嚟嘅火花又唔同咗。」
除了翠如，原來今次《果欄中的江湖大嫂》裡面跟他做對手戲的香香（岑麗香）也是一個相當合拍的對象，連他老婆也讚他們十分合襯，他說：「香香今次又係一個新對手，連我老婆睇完啲宣傳片都會覺得我同佢幾襯，幾好喎。初頭佢覺得我同翠如好襯，係螢幕情侶，今次到香香，其實我都好開心。我係幾幸運嘅，拍咁多劇同個女對手都溝通到，我都聽過有啲演員話係溝通唔到，因為個諗法唔同，變咗你有你做佢有佢做咁。」
對於網民有話過他拍來拍去都是這個樣，覺得他的演技沒有進步，其實浩然也曾經墜入這個迷思，自己減產也有一部份是這個原因：「減產最主要嘅原因係不停拍嘅演出水準會不停降，太機械式，喺觀眾心目心只會愈來愈減分。真係需要時間沉澱自己，餓返個戲癮出嚟，病之前我真係拍到唔想再拍，拍完《果》後兩個幾月無拍嘢，已經想拍新角色。以前有時有啲位拍得好夾硬，幾時都唔知點做，但要夾硬拍啲嘢出嚟，你無時間去消化其實好難俾到新鮮感觀眾。」
對於網民的意見，浩然是正面的，是讚，他會感到開心，是彈，他會吸收意見，他表示：「至於他們有有網上面嘅平台係好嘅，我自己都會睇嚟作參考，拍《情越雙白線》嗰種我開始去睇。好多時我哋設定一啲位係會有個效果想要得到，我哋又會去睇返觀眾嘅回應，原來嗰個位得唔得其實睇得返出嚟，之前《平》好多正面留言其實好開心，你要人彈好容易，要讚其實好難。」一個成功的演員，最緊要個人夠謙卑，能夠吸收別人的批評，浩然已經是一個絕佳的例子。