【包青天】地獄通告安排失當玩死演員 李嘉投訴:食完藥都無病假

撰文:
最後更新日期:

《包青天再起風雲》這套劇在拍攝途中已經鬧出不少事件,繼早前有些演員連名字都沒有印在宣傳海報上,昨日李嘉又在網上呻編更出現問題,明明0330通告,但原來要等到午飯後再開始拍攝。更加令人氣憤的是,原來男主角譚俊彥試過拍十幾個鐘,休息一個鐘後,再拍十幾個鐘,究竟係發生咩事?

李嘉在微博上發炮。(微博圖片)

《包青天再起風雲》的劇組這段時間都有橫店拍攝,TVB出外地取境,當然希望盡快完成事件,預算就可以相對地少。不過因何事搞到李嘉如此火滾呢?在接受《香港01》訪問時,李嘉表示:「事緣係咁,嗰日落通告係0330,咁後來我哋換好晒衫化好晒妝準備出發,個導演先發現頭場原來無我哋,同埋我哋開封四子(李嘉、譚坤倫、李日昇和黃耀英)加埋公孫先生(曹永廉)結果係無出發到,等到1000先出發。」

一班演員在橫店拍攝。(Instagram圖片)

+4
+4
+4

李嘉續說:「去到現場都差唔多放飯,之後先到我哋埋位,有時呢方面個編排係幾失當,加上早幾日我又病咗,因為橫店呢邊忽冷忽熱,劇組都有唔少同事感冒。咁去咗當地睇醫生,仲開始發燒,其實食完藥都無得休息請病假,所以休息時間對我哋嚟講真係好重要,如果唔考慮呢樣嘢,咁樣排更,去到要等幾個鐘,你話呢幾個鐘如果俾我哋休息會唔會更加好呢?」其實這種編更失當的情況,只要有關工作人員多加留心,根本可以杜絕這些事情。

唔怪得連曹永廉都話辛苦。(Instagram圖片)

事件還未完,李嘉表示男主角譚俊彥更加辛苦,他說:「同埋有時啲通告係好離譜,其實男主角仲辛苦,佢係收2700(即凌晨3點),之後要佢開0330再接一個通告化妝,基本上佢係得一個鐘頭休息,衰啲講連妝都唔使落直接再開工,精神唔夠嘅情況下點樣去拍戲先?之前喺香港我都試過,佢哋係安排收工收凌晨5點,之後開朝早8點,仲要係拍打戲。所以有時呢種模式係忽略咗演員,因為演員係人唔係機器,無可能做完十幾個鐘,熄機一個鐘,之後再開機十幾個鐘,無人會捱得住。」

譚俊彥都忍唔住上微博呻苦。(微博圖片)

其實一個演員,想要做好一件事,除了演技之外,足夠的休息也是相當緊要。李嘉表示:「其實做任何嘢都好,休息係好緊要。而家TVB拍攝方式,追求拍出嚟個鏡頭要靚,以前三機拍攝,而家變咗兩機拍,但係拍嘅shot係多咗。演員同一段戲以前可以四到五take就搞掂,但而家要做十幾take,係未計你ng喎。返到去係可以剪得好靚,但咁樣係加重咗演員個工作負擔,咁如果再喺通告上面唔調整,仍然係用3機拍攝嗰種chur法,嗰種咁趕住要拍晒啲嘢嘅高密度拍攝,變咗係一件好辛苦嘅事。你話要追大陸拍攝水準,無錯大陸的確係咁拍,但唔好忘記,大陸嘅資金同時間都俾你多得多。其實係軟件方面跟唔到,剩係跟硬件例如啲靚嘅機,但有無考慮過演員承唔承受到呢?呢個先係最大因素。」

當演員一個shot要拍多幾次,相對的休息時間也要增加。(Instagram圖片)

李嘉鬧《包青天》導演唔識尊重演員 武神爆seed:唔係靠大聲靠惡

下體任踢示範氣硬功短片瘋傳 夏滿哥李嘉:傷害會十分嚴重

其實追求拍出來的效果靚並沒有錯,要追上大陸的進度簡直是明確的目標,但的確要有相關的配件去支持,至少不能強硬增加演員的工作量,這只會得不償失,李嘉最後說:「有好多時會見到演員不停重複重複拍同一個take,已經累到連講句說話都辛苦,仲點搞到好嘅戲出嚟呢?鏡頭係靚嘅,要咁靚不如去拍硬照。其實我都唔知而家係成個TVB都係用呢種方式去拍攝,定係剩係某啲劇先用呢種模式,我自己會覺得如果咁樣拍對演係辛苦,希望下一部劇唔好遇到呢種情況喇,讀稿都難喇,唔好話做戲。」希望TVB可以好好認真考慮這個問題吧。

連練武之人李嘉都頂唔住,其他演員仲難捱。(微博圖片)



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。