【書展2018】朱千雪公開「至愛書單」三甲：買過無數本送畀朋友！

「香港書展2018」去到下周二（24/7）結束，相信不少讀者已經去了趁趁熱鬧，還未有時間入場選購心頭好？不要緊，書本並非只能夠在書展買，就算書展結束大家都可以繼續到各大書局掃書，只怕你不知道應該要睇邊本書！而現正攻讀法律博士的朱千雪（Tracy）是圈中有名的愛書之人，現在她便向大家分享自己的「書List」，等各位書友仔可以做做功課：「呢三本係我人生至愛，買過無數本送畀朋友，因為我覺得好有用！」咦，難道千雪BB便是因為睇完這幾本書而成為女神？

《The Rules of Life》：對你生命有幫助！

千雪BB第一本推薦書的是英國作家Richard Templar在2005年出版的《The Rules of Life》，她指此書能夠給讀者一些有用的人生指引：「書本基本上都係作者覺得咁做對你生命有幫助嘅提議，例如你覺得好氣餒、好灰心，就自己心裏面數10聲，咁會冇咁容易同你嘈交；或者係你同你伴侶嘈交，作者就會叫你做第一個道歉嘅人，咁先可以維繫到個感情。」相信她與好姊妹岑杏賢主持big big channel節目《心理急救室》，為大家解決煩惱時，都有應用到書中提及過的方法。

John Gray名著：人人都要睇睇！

而第二本推介書是美國作家John Gray所寫的《Men Are from Mars, Women Are from Venus》（《男人來自火星，女人來自金星》），千雪BB直言此書是「人人都要睇睇系列」的榜首：「因為男同女睇嘅嘢甚至遇到嘅問題永遠都係唔同。本書列舉一啲情形出嚟，再將男同女分開，好似有一對情侶嗌交，女仔就會『不如我哋傾下啦』係咁摞個男仔去傾，但男仔會覺得咁好煩，佢哋會想冷靜先，冷靜完就自然會同女仔傾，而人同人嘅相處成日都有呢類矛盾出嚟，所以本書教到大家男女之間係點樣溝通，等大家避免一啲無謂嘅磨擦。」她認為這本書是專為經常講「我真係唔明男仔諗咩」或「我真係唔明女仔諗咩」的人而設。

Mitch Albom經典：點樣活得更有意義

至於千雪BB第三本推介書便與上述兩本書有所不同，是一本小說：「我覺得呢本係深奧少少，而呢本書就係《Tuesdays with Morrie》（《最後14堂星期二的課》），之前『King Sir』鍾景輝同陳國邦都演過呢本書嘅舞台劇版。」她坦言這本書對她對於得着極大，有着大量人生體會、態度以及心得：「其實佢係真人真事嚟，講一個後生仔，即係作者，定時定候都探一個就嚟走嘅老人家，而個老人家每次都分享一啲智慧畀個後生仔，透過老人家講返自己後生時係點成長，等個後生仔學習點樣看透人生、點樣活得有意義咁。」想不到她會覺得這本「中學生必讀」是人生指南。其實，千雪BB並非只睇勵志書，她坦言自己都好喜歡睇推理小說：「我係一系列一系列咁睇，我最近終於睇《福爾摩斯》系列，哈哈！」