【叱咤2018】謝安琪奪「我最喜愛的女歌手」：每一次攞獎都搲頭

恭喜謝安琪成為「叱咤樂壇我最喜愛的女歌手」，成為今年叱咤的雙料歌后！阿Kay再次上台，從林海峰手上拿過獎之後，除了多謝之外，亦發表了一些當歌手的辛酸感言：「今日真係好夢幻，其實我每一次得到我最喜愛女歌手我都好搲頭，因為喺入行到由大家認識，其實我一直都係喺好多唔好聽嘅說話，遇到過好多喝倒采嘅聲音，或者唔好睇嘅眼光，所以我一直都唔清楚『我最嘉愛』係點先得到大家嘅喜愛。但頭先軒仔講咗一樣嘢好好，我覺得作為一個大家認識嘅人，一個公眾人物，有一個好重要嘅作用就係，當我哋有經歷，你眼見我哋都會經歷人生嘅高低，我哋有時都會喊，我哋有哀傷，我哋同所有人一樣，人生中有對我哋好同唔好嘅人，但我哋每次企喺台上嘅時候，我哋都盡力，都企返起身，好想為大家貢獻我哋嘅最好。我哋唔知咁做係咪有價值，但都好想畀大家知道，我相信其實所有人都一樣，不過如果你肯嘅話，你都可以企返起身。我覺自己係一個好平凡嘅人，我嘅人生係比較低調，好平淡。所以我好多謝音樂帶畀我經歷，帶畀我磨練，畀咗好多人生嘅課題我，令我人生好精彩，令到我生命好燦爛。」