【張學友演唱會】歌神自認取消場次最多歌手:我明白華仔心情!

撰文:
最後更新日期:

張學友《A CLASSIC TOUR學友.經典》世界巡迴演唱會開完200多場後終於重返香港,在今晚(11日)舉行的首場裏面,學友便為觀眾帶來多支首本名曲,既有勁歌,又有熱舞,令歌迷完全唔捨得走。雖然看似勢輕就熟,但學友騷後接受傳媒訪問時卻直言好緊張:「壓力大,免疫系統就差啲,上次喺高雄站已經有少少唔舒服,所以今次上台都係帶住少少唔舒服,又扭到條腰,大家都應該睇到我冇咗慣常超過90度嘅鞠躬,仲有14場,盡量小心啲。」

張學友世界巡迴演唱會尾站香港站首次演出順利結束,仲有14場,學友加油!(葉志明攝)

記者問腰傷情況如何,學友反問:「你哋覺唔覺?(唔覺。)所以情況OK,跳舞都OK,唔係好大問題。」他又笑言不用醫生隨隊,情況不嚴重:「其實醫生都有畀定藥,預防流感,食完就暈暈哋,但係冇咩影響。」他更謂因為場數多,好多情況都發生過,所以有晒應變方法。

提到同樣是「四大天王」之一的劉德華因病取消多場演唱會演出,學友坦言:「我聽到呢個消息仲驚,有心理壓力,都希望佢快啲好返!我自己就應該係取消最多嘅歌手,所以都教唔到佢咩嘢,不過就好明白取消嘅心情係點,我哋上得台梗係想好,做唔到最好已經唔好開心,做唔到件事就更加係好辛苦嘅事。」

學友坦言知道劉德華取消演出後感覺壓力更大,又指自己取消場次更多,好明白對方心情。(葉志明攝)

講到大女兒張瑤華亦是座上客,而且睇得投入又跟住唱,學友即笑說:「佢都係我歌迷之一,經過今次演唱會之後!(佢係你強心針?)佢都睇咗好多場。(拉埋佢上台表演?)唔會。」他坦言女兒都擔心他健康情況,但自己都會盡力做好、做完這個演唱會:「其實都唔係太辛苦!」

記者問學友會否拉大女兒張瑤華上台一齊唱時,他即笑住說:「唔會!」(葉志明攝)

傳聞學友巡唱後會「封咪」,他再一次辟謠:「絕對冇啲咁嘅事,其實我喺台都成日講,『睇得一場得一場,睇完就冇』,我都唔知個風係唔係主辦放出嚟!雖然冇人知聽日會點,但係我自己就鍾意做,真係鍾意喺台上表演,同埋我唔係幾鍾意退休呢件事,我希望自己可以喺唔同時間,發揮、試下唔同嘢,因為唔試就唔知,我之前都唔知自己仲跳得。」他又承認前段有少少聲沙,一來未完全開聲,二來音響未較得準:「不過後面都冇乜嘢。」

學友話自己好想繼續唱,「封咪」一說只是謠傳。(葉志明攝)



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。