【鐵探】初見姜皓文好鬼驚 小演員潘姿善：因為佢好黑好似大賊！
撰文：吳子生
出版：更新：
無綫劇集《鐵探》昨晚（27/4）在新蒲崗舉行飯局，出席藝人包括有姜皓文、吳庭燁、鄧佩儀（Gloria）及兩位童星黃學盈和潘姿善。在劇中飾演袁偉豪女兒尚睛的潘姿善，初登銀幕，憑樣子甜美可愛成功彈出，被一眾網友Like爆。現年6歲善善話：「我覺得拍戲好好玩，我之前見到黑哥哥（姜皓文）好驚佢，因為佢好黑，好似大賊咁，不過宜家就Friend咗，因為佢好溫柔咁對我嘅，咁我咪鍾意佢囉。」
Gloria覺得善善樣子好有親和力，見到她容易感到開心和快樂。（吳子生攝）
Gloria亦大讚善善夠專業，拍攝時從不說辛苦：「好記得有一場戲講我哋喺後巷度跑，當時天氣非常之熱，我問佢，你攰唔攰，佢話唔攰，其實我見到佢真係好攰，但係佢話我聽唔攰，心諗呢個小朋友真係好犀利，諗返起我呢個歲數，只係識訓同食，同埋識去玩咋，所以非常佩服佢。」
吳庭燁、鄧佩儀、黃學盈及姜皓文現身無綫劇集《鐵探》飯局。（吳子生攝）