【法證先鋒IV】黃心穎角色換人兼要重拍 總監梅小青:損失逾千萬

撰文:
最後更新日期:

黃心穎與許志安被爆出的士車廂激吻事件轟動全城,外界齊聲怒罵呢對出軌男女,兩人要即時停工,復工無期,演藝事業凍過水。心穎早前已拍好了4套無綫新劇仍未播出街,包括《堅離地愛堅離地》、《丫鬟大聯盟》、《牛下女高音》和《法證先鋒IV》亦受到影響,原本接棒《鐵探》播出的《堅離地》已首當其衝被抽起了,有傳該劇的男主角張振朗為此嬲到震。而最新消息是備受TVB重視的年度重頭劇《法證IV》需要重拍,有可能會延期播出。

安心出軌事件牽連甚廣。(IG圖片)

據悉,TVB已落實決定重拍《法證IV》,將會剪走黃心穎的戲份,由另一藝人接替她的角色再補拍,但暫未知由誰去取代她。心穎在該劇入面飾演記者妹,屬第一女主角,受影響的部分達三分之一,劇組知悉要重拍後已即時聯絡受影響的藝人,要重新度期,大隊預計下月可以開工。今次重拍還包括台灣的七日外景,台前幕後要再埋位開工,台灣連香港共五十組戲,各項開支費用龐大,可說是勞民傷財,損失超過港幣一千萬元。重拍原因當然是因為心穎的形象插水,由於該劇已跟內地簽了合約將於11月在中、港兩地同步播映,在內地播劇需要獲得批文,而有關方面一直嚴打形象負面的藝人,所以如果演員涉及桃色醜聞,獲批的機會近乎零。

之前心穎同黃浩然一齊去台灣為該劇拍外景。(IG圖片)

《香港01》訪問了《法證IV》總監製梅小青,她親口承認該劇確會重拍。小青姐說:「我哋依家好努力咁執過劇本,又要重整演員,仲有好多嘢要準備,心穎係第一女主角,無可能唔要呢個角色,所以先要重拍,目前未知會由邊位演員補上。原本套劇安排咗11月4日播出,如果淨係香港都趕得切,但係要送審內地需要預早兩個月時間,可能未必趕得切。我好多謝公司今次咁支持我哋,畀咁多人力物力同金錢我哋去重拍,又好多謝一班演員一呼百應,啱啱出事時仲未決定要唔要重拍,佢哋已經WhatsApp同我講,話會支持我嘅一切決定,當知道要重拍之後就即刻度期配合,個個都毫無怨言,佢哋真係好好。就算施嬅 (李施嬅) 已經離咗巢,佢都好肯幫手再拍過。」

小青姐證實《法政IV》會重拍。(資料圖片)

問到小青姐入行多年可有試過如此大規模的重拍,她說:「咁一定會有試過重拍嘅,例如唔滿意又或者演員突然出咗咩狀況,重拍十幾場戲,即係二、三組戲左右,但係今次大約五十組戲咁大規模就從未試過。」那麼當她最初知道安心出軌事件時有甚麼反應?小青姐說:「我一聽到個消息時係呆一呆,當時我哋已經為套劇做咗幾日後期。其實我之前以為《法證IV》開拍唔到㗎喇,點知竟然開得成,好開心,咁辛苦拍好晒,去到做緊後期,套劇有好多特技CG,心諗有無可能重拍,因為牽涉太多喇,點知得到公司咁大力嘅支持畀我哋重拍,真係好多謝公司。我會向好嗰方面諗,可以將套劇拍得更加完美。」她又認同藝人應顧及自己的形象:「藝人企出嚟作為一個偶像,會被大家模仿,所以要保持一個良好嘅形象。」

小青姐話暫時未知由邊個藝人取代心穎。(IG圖片)

大家一齊睇下呢套劇嘅一啲拍攝花絮相:

+12
+12
+12


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Microsoft Edge 或 Safari。為避免使用網頁時發生問題,請確保你的網頁瀏覽器已更新至最新版本。