與Stanley「兄弟檔」拍住上 姜濤為IG風波解畫:我好驚有唔公平

撰文:李婉文
出版:更新:

組合MIRROR成員姜濤和邱士縉(Stanley)今日(15日)出席手袋品牌活動,Stanley就大爆自己曾送過手袋給女朋友,好sweet。而姜濤就表示自己不太熟悉名牌,不過之後都想送個手袋給媽媽,因為自己每年母親節或媽媽生日都會送禮物給她,果然孝順。今日同場的還有歌手張敬軒,軒仔曾經在公開活動向傳媒讚過MIRROR,姜濤坦言有把握機會跟前輩聊天:「佢不嬲都好support我哋,其實就算好短嘅時間佢都會問候我哋,所以好多謝佢。」

組合MIRROR成員姜濤和Stanley今日(15日)出席手袋品牌活動。(梁碧玲攝)

近期姜濤和Stanley這個組合孖住出席活動的機會多了,二人坦言私底下好有默契,姜濤說:「其實我一直都覺得Stanley係好似一個大哥哥咁,即係我又唔會話好似好尊敬佢咁,好似Lokman(隊長楊樂文)咁,Lokman有個威嚴,但係對佢,我就會成日同佢一齊搞怪。」Stanley補充:「係啊,我哋成日私底下跑嚟跑去,打打鬧鬧咁,頭先都俾fans見到我衝過去捉住佢。我覺得係我哋唔知點解有個默契出現,可能公司就見到呢樣嘢,就覺得我係哥哥,佢係細佬咁,就開始多咗咁樣嘅組合出現。」

Stanley坦言覺得MIRROR十二子跟軒仔好有緣,軒仔會好關心他們的近況,而他們覺得這個前輩人好好,好搞笑。(梁碧玲攝)

談及近來姜濤的IG其實都出現了一場「小風波」,他為此解畫:「其實我出道之前,比賽嘅時候有fans叫我follow佢,咁可能依家支持我嘅人多咗,就有啲聲音話『點解你follow佢唔follow我』,咁我就好驚有唔公平嘅現象,我有時又睇漏unfollow邊個,咁就一次過清晒,方便啲,我唔會再特登話去揀邊個fans unfollow返。」Stanley:「係啊,我可以證實佢,我哋全部11個男仔都俾佢unfollow,跟住再follow返。所以佢想公平,就淨係follow返啲朋友或者前輩。」被問到姜濤會否為此事有點不快,他直言自己沒有,反而擔心粉絲們唔開心,姜糖們可以放心啦!

姜濤自爆自己有一晚突然靈光一閃不如unfollow IG上的所有人去解決問題,就直接去做,沒有想過會引來迴響。(梁碧玲攝)