【機動部隊2019‧專訪】張達倫鋪路一年北上 「機會多錢自然多」

撰文:
最後更新日期:

無綫與香港警隊聯合製作的電視電影《機動部隊2019》由楊明、蔡思貝、張達倫等主演,以機動部隊為主線,介紹現今的多元化警務工作。自電視電影播出後,獲不少觀眾大讚製作有誠意,充滿電影感之餘,更出動過百警力支援,全實景拍攝令畫面夠真實。飾演沙展的張達倫(Max)在片中狂鬧人,更要手執盾牌跑圈及進行體能訓練,對於整個拍攝過程,Max直言能夠讓觀眾看到這個職業的另一面很有意思。另外,去年Max已跟無綫轉換合作方式,究竟為何拒絕不再做「親生仔」?

攝、短片:陳順禎

服裝:WAGAMAMA PLAYGROUND

《機動部隊2019》是無綫與香港警隊聯合製作的電視電影,由楊明、蔡思貝、張達倫等主演。(劇集海報)

警察一樣有私人問題

張達倫(Max)接受《香港01》訪問時,透露最初收到導演李志倫電話,得知要拍攝有關機動部隊的題材便一口答應,更笑言這套是夢寐以求的制服,可惜未能在開拍前成功修身:「之前拍緊《黃金有罪》入面飾演ICAC,因為時代背景嘅關係,我刻意增肥8至10磅。凌晨拍完《黃金有罪》,剪埋頭髮就立即開拍《機動部隊2019》,所以冇時間修身,如果依家拍就會好啲!」

由於今次是Max首次嚴肅飾演紀律部隊,所以拍攝前特別請教了任職警察朋友。經過為期兩個月的拍攝,雖然體能上應付得到,但坦言拿著17磅防暴盾牌都感吃力,明白到訓練過程極為苛刻,加上要長時間工作,承受的壓力也很大,所以更加尊重從事這個職業的每一位:「其實拍《機動部隊2019》就係想普羅大眾知道,警察除咗返工以外,同樣都係有私生活。佢哋收工後要面對嘅事,同大家一樣,正如楊明嘅角色,有患腦退化症嘅爸爸,同樣面對感情問題等等。有好多因素會影響到佢哋嘅情緒, 但仍要保持專業,咁樣就可以畀市民企喺警察嘅角度去睇。」

點擊下圖看更多劇照:

唔做親生仔尋找自己的可能性
去年Max已跟無綫轉換了合作方式,問到可有減少在無綫的演出機會,Max指公司待遇一向不錯,自己都有拍攝不同劇集,如《黃金有罪》、《大醬園》等。至於為何有這個不做「親生仔」決定,全因囝囝出世後思想改變,想挑戰更多元化的演出和角色,接觸不同製作單位,無論電影好,網劇或網絡電影也好,去探索究竟自己在角色層面上可以走得多遠,能夠帶到多少給觀眾。提到一般藝人有子女後,都會追求較安定的生活,Max直言再過幾年一定會選擇安穩:「呢一刻做到嘅時候更加要去試,所以呢個選擇有好多朋友或同行都同我講,話我好有勇氣,不過在我角度看,我已經諗通咗呢件事。」

談到可會想搣甩「嚴謹」之名,Max笑言是一件很難的事,因為角色太過深入民心,自己最想做到的是追求角色上的變化。(陳順禎攝)

過去一年已鋪定後路
近年都有不少無綫藝人完約後北上發展,Max透露現時要打入內地市場絕不容易,能否入到內地的圈子亦是另一回事,更因此而不停碰釘:「其實過去1年所做嘅,就係為未來鋪路。係有不停碰釘,經常都會發生講完唔成事,或者同事前講嘅有出入,不過我性格就唔怕蝕底,因為呢啲都係我預期之中,希望能夠遇到真正嘅伯樂。」現時有不同內地經理人欲跟Max合作,但一定要試清楚才知道日後的路怎樣行,否則一子錯滿盤皆落索。

待遇方面,因早前發生的稅務問題影響很大,內地單位都將費用投資在製作方面,不過身價都較香港可觀,笑言:「公司(TVB)一向都係講心唔講金,講喺香港市場公司畀到啲咩我哋,我哋搵錢都係出去搵,一向雙方都有呢個共識,我都好清楚。內地條件一定好啲,待遇一定好啲,所以盡可能唔好同香港比較。」既然下定決心要到外面闖,Max為自己定下了什麼目標?他聞言毫不猶豫地說:「金錢!」說到尾,都是為了讓家庭更安穩,令仔仔能夠擁有更好的成長環境:「當你有更多唔同嘅機會,相信金錢就會嚟,市場大啲,演出機會多啲,自然就會唔同。」

Max很感激張衛健在拍攝《大帥哥》期間,鼓勵自己走出舒適圈。(張達倫IG/@maxc)

話雖如此,要跨出這一步很冒險,亦需要很大勇氣,Max除了得到太太的支持,還要感謝張衛健。他憶起在2017年拍攝《大帥哥》期間,張衛健說了一句話,令他至今仍銘記於心:「佢話,成功嘅人要踩住鋼線去行,你先會試到一啲唔同嘅嘢出嚟,先會試到一啲人哋做唔到嘅嘢,永遠喺Comfort Zone裏面,永遠都係做前人所做嘅事,如果你唔突破自己嘅話,冇用㗎。」這句話啟發了Max,如果不去尋找屬於自己的鋼線,就不會成功,而自己有所成就都能夠給予兒子一個好的榜樣,日後在成長的路上,很自然就會選擇一條努力向上的路。

點擊下圖看更多靚相!

+6
+5
+4


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。