【東張西望】踢爆「鬼王溝女邪功」 利穎怡電話訪問:做完即驚!

撰文:
最後更新日期:

最近三集《東張西望》講「鬼王溝女邪功」,揭發一名自稱專門教授男性「溝女秘訣」的人,實質是騷擾女性。(電視截圖)

《東張西望》由周三(27/6)起,一連三集播出名為「鬼王溝女邪功」的系列報道 ──  一名自稱「鬼王」,自稱專門教授男性「溝女秘訣」的人,實質是騷擾女性,節目組從多角度報道,比如周四(28/6)播出一集,《東張》就找來了一名在太古城工作的女性上班族受訪,她表示曾在上班途中再三被「鬼王」及其學生騷擾和跟蹤:「一年入面,最少喺太古城撞過佢十幾廿次。每次都有啲奇奇怪怪嘅男仔跟喺後面,喺佢哋面前亂講嘢,又叫班『門生』影低我。喺銅鑼灣見到,又會喺我男朋友面前,話我做過Part-Time Girlfriend。」

有受害者上節目講述自己被騷擾的經過。(電視截圖)

日前一集(6月29日),節目則邀請兩位「鬼王」的「前門生」David、Tim現身說法,他們在節目中均承認曾受「鬼王」指示,在街頭向女性攞電話和作出其他騷擾行為,而他們均表示需向「鬼王」支付學費才可以接受他的「溝女課程」。

有被騙學員都上節目講,付出金錢之後卻對結識異性毫無幫助。(電視截圖)

遭利穎怡質問 「鬼王」反問:點解會冇人報警?

為了得到更多第一手消息,《東張西望》主持利穎怡(Joan)在節目中親自致電給「鬼王」,期間多次質問他是否當街騷擾女性等事,但他卻多番迴避問題,並多次反問:「如果真係好似網上面講,話搶電話嘅,點解會冇人報警?你有冇腦㗎?」利穎怡:「如果我哋都有人報咗警?咁佢哋係咪報假案呢?」他:「全部報假案,如果真有其事,我一早俾人拉咗啦!」

節目講這些人經常到處向陌生女性索取電話。(電視截圖)

利穎怡:佢訪問好兜圈!

利穎怡(Joan)接受《香港01》訪問時說:「佢訪問好兜圈,問佢問題都係用反問句覆。之後仲話,佢而家有好多個學生,太忙,唔再收㗎啦,每個星期都要教成百個學生,仲話收生要有標準,每個男人都要Send資料畀佢。我問佢:『咁你靠咩維生?每日咁多學生,但係又話學費用嚟做慈善。』佢話:『我咪靠食你哋啲『十手飯』囉,我都好窮㗎。』」

主持人之一利穎怡電話訪問完「鬼王」之後,表示擔心自己安全。(電視截圖)

「鬼王」主動邀請見面 節目組認太危險沒赴約

訪問時會害怕他嗎?她回答說:「訪問緊嘅時候好嬲,因為佢『問候』完我媽媽之後,就喺度話我港女,喺度鬧我,實在太唔尊重。開始電話訪問嘅時候,我都唔係好驚㗎啫,但係佢啲答案實在太奇怪,擔心佢會做啲乜。佢有話約出去傾,做話帶埋100個學生出去。我當時就話會專人去搵佢,但係講完電話之後,我、導演同Writer都覺得太危險,擔心我嘅個人安全,所以就冇出去。其實我自己都有少少擔心自己安全,我做訪問嗰下唔驚,但係做完個訪問就即刻驚!」

Youtube上有不少這位「鬼王」所拍的片段,其中亦有不少抵毀女性的言論。(電視截圖)

律師指「鬼王」當街「打獵」或已觸犯遊蕩罪

《香港01》記者就著節目中播出,以及片中兩位「鬼王」的「前門生」David、Tim、受害者女仕所述的情況,詢問了法律意見。執業大律師陸偉雄回覆查問時,表示該名男子或已犯法。「首先佢如果企喺條街度,等待個女仔,就似打獵咁,就已經干犯咗《刑事罪行條例》第160條,遊蕩罪。而未經個女仔同意,即係攬、錫、摸女仔身體部位,同埋搭膊頭,有非禮意圖,就已經構成觸犯《刑事罪行條例》第122條,非禮罪。就算冇非禮意圖,佢搭膊頭,都可以告佢普通襲擊罪,即係《侵害人身罪》40條。搶電話輸入資料,亦都構成《盜竊罪條例》第9條。」



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。