【法證先鋒IV】湯洛雯火速完成重拍黃心穎戲份:我只想瞓番幾日!

撰文:
最後更新日期:

黃心穎因偷食事件形象大插水而備受眾矢之的,不但令其主演的劇集《法證先鋒IV》無法於年尾以台慶劇播出,被逼延期到2020年1月才能播出,其戲份亦全被刪走,由湯洛雯(靚湯)頂上兼重拍。靚湯為了連戲,除了必須喪減10磅之餘,更要在天時暑熱之下穿冬天衫補拍,經過一個月來連日拍攝後,靚湯終於在周二(2日)殺青。

靚湯重拍所有黃心穎的戲份,壓力甚大。(視覺中國)

靚湯昨晚完成所有戲份後,在Instagram分享一張《法證先鋒IV》的台灣拍攝場口劇本的照片,並寫下煞科感言:「我全套劇煞科了!我想我這輩子也不會忘記在這套劇入面學到的東西,一個月的密集訓練,短期內逼自己整個人去進步,雖然過程其實真的是蠻辛苦,但有人跟我說成功需苦幹,我希望整套劇台前幕後的努力,將來大家可以感受得到,感謝大家的努力!」

靚湯昨晚(2日)正式完成全劇拍攝,並在IG寫下感言。(湯洛雯IG:@roxannetong)

靚湯笑言能調理好自己身體,成為「Fit湯」!(湯洛雯IG:@roxannetong)

靚湯入行首次密集拍劇:對我嚟講挑戰好大!

她今日(3日)下午回覆《香港01》,表示在《法證先鋒IV》的經驗非常寶貴:「殺咗青當然一身鬆晒,因為今個月真係每一日都不停補戲,從來都未試過咁密集去拍一套劇,而且要喺咁短時間內投入角色,對我嚟講個挑戰真係好大。拍嗰時係好大壓力,但係拍完之後發覺,自己一個月內成長咗,我覺得冇一啲真正嘅上堂方法可以比呢個經驗更加work,所以真係好似上咗好寶貴嘅一課咁。 」

雖然聽得出靚湯心情興奮, 不過依然能從聲線中感受到她的疲累:「我依家只係想好好咁喺屋企瞓幾日覺,哈哈,過幾日都有工作,但都希望可以趁呢段時間調理番自己嘅身體狀況,Keep番Fit,希望大家可以見到『Fit湯』!」

她坦言參與《法證先鋒IV》就像上了寶貴的一課。(陳順禎攝)

演出劇集接連抽起 靚湯以平常心面對

靚湯主演的《丫鬟大聯盟》亦因為受女主角黃心穎的拖累,導致已完成拍攝的作品極有可能成為倉底貨,更有傳《機場特警》亦因最近警民關係緊張而被抽起,需延後播出。

雖然兩套參演劇集都可能播映遙遙無期,但靚湯可謂是「塞翁失馬,焉知非福」,得到出演重頭劇《法證先鋒IV》的機會,她亦對此保持樂觀心態:「其實我哋演員拍完都真係要等公司安排出唔出街,或者幾時出街,所以我一向都冇特別去理。如果我拍咗套劇出嚟,真係要遲啲先出到街,好似之前《婚姻合伙人》咁,我哋都等咗年幾兩年先出到街,其實都冇咩所謂嘅!但係今次可以參與《法證先鋒IV》,對我嚟講真係好寶貴嘅一課,係好開心嘅!」

《法證先鋒IV》由(左起)譚俊彥、陳煒、湯洛雯及黃浩然主演。(陳順禎攝)

黃心穎(中)形象大插水,被劇組「叮」走。(視覺中國)



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。