【街坊財爺】黎諾懿一個原因睇好黃智雯攞視后:佢應該坐定粒六

撰文:
最後更新日期:

黎諾懿周五(20日)出席無綫電視劇《街坊財爺》「新世代爭霸戰」宣傳活動,他笑言自從2003年的《四葉草》後就沒有在電視劇中談過戀愛:「《BB來了》一嚟已經做人老公,唔知係咪因為自己做咗爸爸,好少接觸好似Mandy(黃智雯)咁嘅女仔談情,今次重拾戀愛嘅感覺!我有啲大膽同監製講話可唔可以拍得靚少少,因為我好耐冇談過情,所以監製係唔係都book水車,我都覺得幾浪漫,觀眾又好似幾鍾意。」

觀眾取程宇森(黎諾懿飾)和朱瑪莉(黃智雯飾)之名,為二人改了情侶暱稱叫「乳豬(宇朱)CP」,黎諾懿覺得甚得意,又希望觀眾繼續追看電視劇。(陳順禎攝)

黎諾懿與黃智雯在《街坊財爺》中飾演情侶,而剛好黃智雯與黎諾懿的太太李潔瑩是同屆香港小姐,對此黎諾懿笑言:「同太太啲朋友合作唔可以撩其他女仔,驚Mandy爆俾太太聽!」這也是二人第一次合作,黎諾懿就對黃智雯讚不絕口:「呢個女孩子無論戲內戲外都會好錫佢,令你好快就投入。」甚至預言Mandy今年有機會奪得視后寶座:「連續兩年我嘅對手攞視后都冇失過手,第一年係唐詩詠,第二年係李佳芯,今年就係黃智雯,所以佢應該坐定粒六做套靚衫攞獎!」問到黎諾懿本人對視帝有沒有信心,他更進取地說:「我年年都好有信心!今年仲要囊括飛躍、最佳主持、視帝、最佳情侶四個大獎!」

TVB開台以來沒有演員試過一次過拿綜藝、主持和視帝三個範疇的獎項,黎諾懿希望觀眾密切留意。(陳順禎攝)

問到黎諾懿在電視劇中比較喜歡談戀愛還是當爸爸,他就說:「兩樣嘢嚟嘅,Mandy係大人嘛輕鬆好多,《BB來了》就應付啲思想未成熟嘅小朋友,但佢哋又好得意。」所以黎諾懿近來就衍生了一個想法:「我見到《BB來了》嗰七個『尹豬豬』開始長大,就好想同佢哋一齊做綜藝節目,等佢哋大多少少,我呢個爸爸同Ali(李佳芯)媽媽可以同七個豬豬做啲嘢,但拍劇就唔好喇,我驚應付唔嚟!」

+8
+7
+6

黎諾懿不時在個人社交媒體分享兒子小春雞的成長片段,最新一段小春雞更挑戰演技;說到兒子,黎諾懿眼裡洋溢着愛意:「我啱啱喺馬來西亞返嚟,冇見佢五日,覺得佢大個咗好多,都發現佢學嘢好快!」這也令黎諾懿在家中更注意自己的言行:「我講電話都匿埋講,我唔想啲不必要嘅詞語出現咗而俾佢學咗,盡量控制!」問到黎諾懿希望小春雞長大後當演員嗎?他就斬釘截鐵地說:「唔想,千其唔好!我成日都話演員係個好被動嘅行業,希望阿仔乖乖地,去做一啲創造機會嘅行業。」



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。