慶餘年|上杉虎赫子銘暖男變渣男 前妻自爆:不想伺候他瘋狂慾望

撰文:鄺鈺瑩
出版:更新:
赫子銘婚後工作量唔算多,反觀何潔因為係超級女聲,所以工作長撈長有。離婚後,赫子銘工作量更係一隻手數得晒,《慶餘年》算係其中之一。(微博圖片)

除咗范閒受慶帝之命,將肖恩押送到北齊換回言冰雲,《慶餘年》將會有一批新角色登場。當中包括肖恩義子上杉虎。身為九品大將軍嘅上杉虎,武力超強,膽色過人連豬肉都敢生食,范閑見到都怯一怯。

赫子銘喺《一路上有你》對何潔關懷備至,「赫子銘暖男」一詞在節目播出後多次成為熱搜。(微博圖片)

飾演上山杉嘅赫子銘出道多年但作品唔算多,不過佢同前妻何潔嘅事跡就一定精彩過師奶劇集。2013年赫子銘與超級女聲何潔領證結婚,翌年誕下兒子七寶、一年後再誕下女兒寶妹,名副其實三年抱兩。二人於2015年時一同參演真人騷《一路上有你》表現恩愛,赫子銘不時「媳婦兒,你餓了嗎」、「媳婦兒,你冷了嗎」成功塑造暖男形象。之不過,喺2017年傳出二人婚變,期間更流出一條電台節目音頻,內容係赫子銘向主持人大吐苦水,指何潔脾氣暴躁、嫌佢賺得少錢、性生活不協調等等,當時嘅電台主持人力指赫子銘不是,話佢只係抱怨,完全無負起男人養家責任;另一邊廂,何潔亦在微博發文指自己因工作而體力透支,暗示自己賺錢養家辛苦,之後又喺節目中淚崩表示「變成了這樣的鬥爭式分手,我不會再結婚了」。

婚變前,何潔曾發文抱怨賺錢養家,加上之後又在節目喊住咁話唔會再結婚,搞到大家都以為赫子銘有問題。

2017年底,法院正式判决二人離婚,雖然赫子銘在聲明中表示「我是被離婚的」,但大眾已將佢標籤為「食軟飯的渣男」,形象插水導致零工作。2018年,何潔被爆出與樂手刁磊經常密會,而刁磊嘅老婆當時亦曾出面指控,當大家準備食花生之際,何潔喺微博以千字文否認婚內出軌,文中提到「因為我生完孩子不想『伺候』他瘋狂的慾望,所以我就被斷定一定在外面有野男人了」,仲話連粉絲都誤會佢,講到十分委屈咁……但最好笑嘅係何潔喺2019年初爆誕下第三胎,而經手人係刁磊當時曾發文表示:「本來就沒想隱藏什麼,只是我們選擇低調生活,被迫公布就索性大方承認。」到底有無婚內出軌留待大家自行判斷,不過可以肯定嘅係喺同赫子銘分居期間,何潔多次被影到同刁磊睇樓、喺街頭攬同拖手。真係複雜到連TVB都拍唔出。

喺節目上喊完一年後,何潔誕下第三胎,說好的不再結婚同性冷感呢?(右2為刁磊)
+14