【矚目配角】王俊棠公開TVB生存法則 斥後生唔識撈:冇用腦!

撰文:
最後更新日期:

雖然王俊棠(棠哥)在無綫(TVB)處境喜劇《愛.回家之開心速遞》裏面,對兒子池子孝(阮政峰飾)、女兒池美麗(鍾凱琪飾)疼惜有加,是一等一的「池富」,但一直以來他在電視、電影都主要飾演大奸大惡之人,更有TVB「御用惡人」之稱,他首個TVB劇集角色,便是《陀槍師姐》裏面的聶世官,一個以真身人物葉繼歡為原型的賊王,然後《陀》劇系列第2、3輯,都是由他演「終極Boss」,「但我覺得《陀槍師姐IV》係我最滿意嘅,我自己設計埋個形象,紅毛、紅鬚,有啲發揮,出到嚟好勁,仲要殺埋個大佬!」

點擊下圖觀看棠哥精選角色造型:

+9
+8
+7

TVB御用惡人

今日(22/5)剛好64歲的棠哥,加入TVB達23年,拍了接近130套劇集,過半數都是奸角,他直言每種奸、每種惡都是不同,斯文敗類和惡霸縱然同屬奸人但卻有天淵之別,「個樣唔同、諗法唔同、做法都唔同,演秦檜嗰啲就要卑躬屈膝,陰陰沉沉,笑騎騎放毒蛇。」至於奸中之奸,現時必是內地宮鬥劇的一班娘娘,「表面上對你好好,其實後面就想你死,完全反映到人本身嗰種幸災樂禍嘅感覺,見到人衰個心會好似好開心咁,人好又唔抵得,最好就自己好。」難道棠哥骨子裏也是這樣?他直言年輕時確實好勝:「但人愈大就愈覺得贏咗又點,好多嘢根本就用唔着,你屋企成疊底褲,幾時着到底嗰啲?面嗰幾條着着下洗完又放番上面。」

王俊棠正式入行前,曾經擔任過模特兒多年,更與梁家輝等到澳門出席當地首個時裝騷:「除咗身高之外,我覺我當年自己好似隻馬咁,冇乜脂肪嘅!」但因為做模特兒唔算搵到食,所以他身兼多職,幫補家計。(陳順禎攝)

+4
+3
+2

全裸出道

時間回到1979年,棠哥細佬不幸遇上車禍,「雖然仲有家姐、細妹,但得返我一個仔,所以我都唔繼續行船喇」。決定留港工作的他,一邊與朋友合作做運輸生意,一邊在蘭桂坊蒲點「DD」(Disco Disco)打工,一邊做模特兒行騷,一邊做「茄呢啡」,半隻腳踏入娛樂圈,到1985年獲李修賢、王鍾邀請,正式投身影圈接拍《流氓公僕》,「有人搵我,幾大都去啦,係咪先?(全裸喎!)全裸呀,好犀利,嗰時帶起咗個熱潮,之後成龍又裸、洪金寶又裸,好多人都裸。」棠哥之後一直在影圈打滾,或者惡得太入型入格,他於1997年的其中一天,在其經營的酒吧「雷明登」遇上賞識他的《陀槍師姐》監製鄺業生,自此走進小熒幕,晚晚陪住觀眾電視汁撈飯。

點擊下圖重溫棠哥在《流氓公僕》中的全裸演出:

+8
+7
+6

TVB生存法則

「喺TVB拍第二套戲,做(1998年版《鹿鼎記》)鰲拜嗰陣,我先發現自己係唔識做戲。」棠哥那時41歲,比起當年分別30歲和26歲的陳小春和馬浚偉兩位主角年長一截,但對他而言,這兩位後生仔才是電視前輩,「真係達者為先,唔好以為自己做咗一段時間電影就好叻,有啲前輩真係好謙虛,真係要向佢學習,佢唔會話你,耐唔耐會提點你。當然啦,而家有啲後生就以為自己好叻,會指手劃腳,都唔緊要嘅,你幾廿歲仲同佢計較咩?」乍聽起來,棠哥似是對新一代演員有不少看法,而他亦直認不諱,除了職業道德──「我好憎人遲到」之外,最大的問題是「唔識撈」。

「我記得我有套劇係要吊威吔嘅,個演員要吊到五樓高,之後跌番落二樓,咁下面當然係有紙皮墊住啦,但係呢啲嘢點解要做先,如果你話唔做,替身就會做,呢啲係畀替身、武師㗎嘛,你做乜搶埋人哋個位,你就係唔醒目,你係得,但你都要畀碗飯人食㗎,都唔用腦嘅!」雖然棠哥話自己當時並非在現場,細節都是從別人口中得知,但故事卻是確確實實隱含着在TVB上下通用的生存法則,「你提佢,佢都唔高興,你以為人哋唔記得,唔係呀,只係一時唔記得啫,你出咩聲,出聲即係話人唔好,個嘴好緊要,Keep your mouth shut。」

訪問期間,王俊棠在天台上爬高爬低,比起好多後生仔更加百厭。事實上,他十多歲行船做水手途經神戶市時曾經意外摔倒,導致腳部骨折。(陳順禎攝)

綠葉王

提到TVB演員近年逐一離巢,其中一位綠葉王劉江離開TVB受訪時更暗指自己遭待薄,令外界不少人怪責這間全港最大電視台不懂如何留住人才,作為23年老員工的棠哥便直言雙方都有問題:「舊嘅唔去,新嘅就唔嚟。我哋都要適者生存,既然公司要改革、要變,你就要適應公司,唔接受改變就唯有走,唔接受又唔離開就你自己辛苦。」確實,多數觀眾都察覺出TVB正在改變,只是改變速度未必追得上時勢,作品仍然與國際標準,甚至國內水平有所差距,棠哥坦言一切都是錢作怪:「TVB規模好細,比起內地十億、八億咁拍,邊有得比,人哋千軍萬馬,一場戲就一萬幾千人。有時畀你一個Budget(預算),未曾拍完,就冇晒Budget,咁點呀,唯有想辦法拍埋佢,有時都會覺虎頭蛇尾。(往往都衰收尾?)我又唔敢咁講,容乜易俾人炒魷㗎!」果然,對於不可說的事物,我們必須保持沉默,就如維根斯坦《邏輯哲學論》所說一樣。

王俊棠三年前在無綫「長期服務暨傑出員工榮譽大獎頒獎典禮2017」中,獲得「廿年金牌」,絕對是TVB的老臣子。(資料圖片)



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。