中佬唔易做|張松枝唔諗退休最想活在當下:可能我聽日就唔喺度!

撰文:趙允琳
出版:更新:

人到中年競爭力大大減低,想要離開comfort zone轉個新環境未必有想像般容易。現年51歲的張松枝早前在ViuTV真人騷《中佬唔易做》中挑戰為期三日的轉行生活,化身做NowTV的街頭寬頻推銷員,卻竟然發掘了自己演戲以外的新技能?

攝影、短片:葉志明

剪接:蕭泳淇

張松枝笑言轉行難不倒他!(《中佬唔易做》節目照片)

做演員口才更好:做兼職都願意!

雖然是拍節目,但張松枝亦沒有任何特權,要體驗做推銷員就張松枝需先經過見工、上堂和考試的階段,全部合格才有資格真正站在街頭開始推銷:「初時預期會有很大困難,天氣又熱又要戴住口罩,人哋又認唔到我,咪更加騷唔到靚仔樣做唔到生意?於是我就出啲詭計,做咗一個大名牌掛喺胸口,寫住『張松枝』三個字!咁睇唔到我個樣,都睇到我個名吖!有時我仲扮下嘢,飲下水抹下汗,就拉低個口罩,睇下啲人認唔認到我!」他笑言作為演員背慣劇本,演戲多年亦訓練出好的口才能力,因此要背熟資料和在街上推銷都難不倒自己:「所以呢份工係為我度身訂造,我幾鍾意!如果可以嘅話,之後請我做兼職我都願意!」

張松枝在大熱天時戴口罩開工sell寬頻。(《中佬唔易做》節目照片)

幕前做得耐 想挑戰幕後創作拍短片

不少藝人都有開展副業,例如開餐廳、飲品店、甚至乎自創時裝品牌等等,張松枝又有沒有想開副業的想法?他笑言:「好慶幸之前冇咁嘅諗法,你知啦,依家好多人開舖頭都咗出事,哈哈!其實我做幕前做得耐,想參與多啲幕後創作嘅嘢,我有幾個朋友依家夾埋開始創作緊啲嘢,可以畀多啲新嘢自己衝擊一下,例如短片、劇集等等都諗緊。」他認為創作不應一味模仿,最緊要夠貼地、夠創新:「我想同啲後生仔諗啲新嘢出嚟,因為時代唔同咗,一啲黑色瘋狂啲嘅嘢,唔係緊貼依家,係要緊貼未來嘅嘢,例如依家發生緊嘅嘢,未來會係點呢?」

張松枝好想嘗試拍湊BB的育兒節目。(葉志明攝)

想拍育兒真人騷

張松枝入行超過25年從未參與過真人騷,他坦言如果還有機會拍下一輯《中佬唔易做》,想試下去日本導遊,更表示一定會為了拍好節目努力學好日文。他笑言自己亦很想嘗試拍照顧小朋友的節目:「湊一個BB嘅節目應該幾好玩,因為我自細已經照顧BB,經驗好豐富。我細個住屋邨,我阿媽啲朋友要搵保姆,結果我阿媽就畀咗我哋湊,嗰時已經開始經常湊小朋友,所以到而家都仲有啲親戚交低BB畀咗我湊!」超級愛小朋友的松枝表示,之前曾幫手照顧一個BB,直到現時已經4歲大仍然經常見面:「佢唔跟人淨係跟我,仲一定要一個禮拜同我視像傾偈,我有時仲會接佢出去玩,有種好密切嘅感覺!」家有一個11歲兒子的松枝稱,雖然自己很喜歡BB,不過沒有計劃再生多一個:「唔會喇,依家喺中佬,再生唔掂喇!佢讀完大學我都差唔多喇,我養唔起!」

張松枝坦言有為仔仔考慮將來。(葉志明攝)

11歲仔仔超醒目 松枝唔擔心

松枝坦言覺得仔仔非常醒目,所以自己不太擔心他的將來:「如果佢大個想去外國(讀書)咪去囉,但係唔係想去就去,要畀啲成績我睇,我覺得值得去就會想辦法畀你去,不過要睇下我有冇錢先。(有沒有幫仔仔準備一份教育基金?)我有買份教育保險,去到某個年紀就可以支持佢去外國讀書。」

人到中年,張松枝想要好好增值自己練好身手。(葉志明攝)

人到中年骨頭卜卜脆 想搵歐錦棠教打拳?

作為一個中佬,張松枝表示人到中年有不少新目標,希望能好好增值自己:「我好想學功夫,或者關於拳擊嘅嘢,我覺得自己嘅身手退步咗好多,好想搵個師傅再鍛煉一下!以前都起碼都打到個空翻、翻筋斗,依家啲骨卜卜脆,拗親腰就唔得掂!(搵歐錦棠教?)呢啲大師傅,唔好搞啦師傅,哈哈!」他坦言以前拍古裝劇有不少動作場面,尤其一雙腳經常都滿佈傷痕:「老嘅時候有風濕唔知點算,不過我都有定期去做body check!」

最緊要及時行樂!(葉志明攝)

今日不知明日事 活在當下最重要

至於何時計劃退休,張松枝坦言自己不是一個擅於做周詳計劃的人,及時行樂才是最緊要:「有得做就做,定死太多嘢,好多嘢你做唔到喇,如果計埋二、三十年後,可能我聽日就唔喺度呢!(即係你都係一個活在當下嘅人?)係,當我個仔大個咗我更加唔駛擔心添!仲唔需要諗!你到時想做咩就做咩啦!」他笑言人隨住年紀的增長可能反而有另一個突破:「可能我去到70歲會有另一個高峰,我可能做到唔係叔叔,做公公,可能仲攞到金像獎!所以我冇限死自己要幾時退休,我希望係做到我唔想做為止。」

點擊觀看更多張松枝在《中佬唔易做》的拍攝花絮:

+11

點擊觀看更多張松枝的訪問照片:

+23
你可能感興趣