專訪|Jeffrey魏浚笙自認「低B」乜都驚:一個人食飯會覺得好寂寞

撰文:
最後更新日期:

香港多年已經沒有超新星,如果說對上一個未正式出道就跑出的新一代小鮮肉是《全民造星》的姜濤的話,那麼早前憑着ViuTV真人騷《調教你男友》成功引起全城關注的Jeffrey魏浚笙,就是第二位「姐姐殺手」。皆因他外形青靚白淨、帶有少少混血兒的異國風情,再加上健碩的身材以及極反差的性格特別深受姐姐、姨姨觀眾的青睞,節目完結之後人氣急升,更成為各大廣告商的寵兒,各大傳媒都爭住追訪他。不過Jeffrey卻笑言自己隱藏不住真實的自己:「我一開聲就大鑊啦!」

撰文:趙允琳

攝影及短片:葉志明

剪接:梁惠怡

專訪場地提供:Rosewood Hotel 香港瑰麗酒店

Jeffrey笑言自己一出聲就「大鑊」!(葉志明攝)

1998年出世的Jeffrey未拍節目前已經薄有名氣,拍過KFC、CSL和家樂牌濃湯寶等等多個廣告,亦能在不少品牌活動上見到他的蹤影。自從出演節目後更是人氣十級跳,亦有不少經紀公司爭住要,但他卻暫時未有想法簽公司做藝人,認為自己還有一年就大學畢業,應該先完成學業再考慮演藝事業:「一個人最重要有學識,呢個係內涵、內在要有嘅嘢,唔可以咁冇學識,所以開始要努力讀返書。屋企人希望我呢一年都係專注學業先,唔好咁早出嚟做嘢,等讀完書先再諗。一個禮拜返4日學好多嘢做,都佔咗我好大部分嘅時間!」

KFC廣告都有佢份!(網上圖片)

Jeffrey好上鏡。(網上圖片)

雖然Jeffrey望落去擁有偶像般的外形,但其實他以前是個肥仔,小時候更用過不少錯誤方法減肥,例如長期節食及飲咖啡去水腫,雖然現時已經沒有再反彈過,但卻養成一個不良的飲食習慣:「我用8小時斷食法,可能2點幾食咗個麵包就去拍嘢,但過咗8點我又唔食得嘢,結果嗰日我可能咬咗個包就成日唔食嘢,久而久之就會長期好肚餓。」

Jeffrey小時候原來是個肥仔,肚子上有三層肉!(照片由受訪者提供i)

他又表示自己很容易水腫,所以每逢拍攝都會長時間挨餓,只為了自己上鏡時更好睇:「我一水腫個樣同而家完全兩回事,如果我另一日要拍嘢,我前一日嘅晚餐又唔食得,同埋第二日拍嘢10幾個鐘,挨住20幾個鐘唔食嘢,我之後又會瘋狂食嘢,拍完我又會瘋狂食番三、四人份量,所以咁樣嘅飲食都冇辦法操到腹肌!」177cm高的Jeffrey現時體重維持在68kg左右。

Jeffrey靠飲咖啡去水腫,結果卻形成一種戒不掉的癮。(葉志明攝)

Jeffrey出了名是一個「咖啡中毒者」,就連他的粉絲都自稱「咖啡豆」。他解釋自己之所以無法與咖啡脫離關係,是因為實在太依賴咖啡去水腫的功效,就算想戒也戒不了:「我覺得我都幾糟蹋自己嘅身體,我以前為咗shooting(拍攝)為咗瘦買三罐500毫升嘅咖啡空肚飲,嗰陣時唔會有事㗎嘛!但我冇咖啡係上唔到鏡會腫到豬蹄一樣,但唔飲我又會好頭痛,我試過戒14日,但每日都好頭痛,可能我真係上咗咖啡癮,一冇咗咖啡就會好辛苦,所以我而家轉飲齋啡,但都一定唔可以空肚飲。」

Jeffrey表示自己飲水、食飯都會馬上變肥變水腫,為了看起來更上鏡,他在專訪當日都堅持要完成拍攝才吃午餐。(葉志明攝)

不要以為Jeffrey經常健身就一定有強健的身體,他雖然年紀輕輕,但已經開始覺得自己的新陳代謝變得緩慢,就連傷口亦要很長時間才復原:「我係啲水土不服嘅人成日都肚痾,我腸胃好差又唔可以飲奶,一痾可以痾10幾次,好辛苦!同埋我唔可以飲酒,因為我一飲就頭痛就瞓唔到覺要食藥,個頭好似就爆咁!以前朋友約我飲酒我都會去,但慢慢大個,我覺得健康更加重要,所以我變得開始更注重自己嘅身體。」

Jeffrey覺得自己最大的優點就是有恆心,可以100%全力做某一件事,如果叫他之後除衫騷肌亦不會太抗拒。(葉志明攝)

Jeffrey自從出演《調教你男友》之後人氣十級跳,他笑言很開心有更多人認識自己,亦很感謝粉絲願意了解自己。在節目中他是一個經常被女朋友照顧的大男孩,他解釋自己由細到大都經常依賴別人,亦很喜歡被人陪伴的感覺:「有時我一個人喺大學食飯會覺得好寂寞,所以我盡量都會避免自己一個人食飯;一個人去旅行我又會好驚,驚入酒店房有鬼,我好驚呢啲嘢,因為我都真係幾迷信。唔知係唔係因為年紀差唔多,就算有女朋友喺度都會驚,但係有媽咪就唔驚喇,哈哈!」不過,Jeffrey拍心口表示自己都是女朋友值得依靠的人:如果有賊當然係我保護佢啦!但係如果我驚鬼,佢就反而唔驚呢啲,會比我淡定啲。」

Jeffrey其實好怕自己一個人,會否激起女粉絲的保護慾?(葉志明攝)

有不少藝人會在鏡頭前特意營造觀眾喜歡的樣子,不過Jeffrey認為做自己最重要:「我唔會特登做一個假象出嚟,因為咁樣好唔長久,唔想人哋覺得我望落同實質上有好大出入。雖然啲人都會咁覺得嘅,因為通常我一開聲就大鑊啦,啲人就會話:『呢個人低B㗎!』,哈哈!」

Jeffrey列出人生中的十大重要時刻。(葉志明攝)

Jeffrey坦言一個人的學識很重要,現時最想先完成學業。(葉志明攝)

點擊觀看更多Jeffrey訪問當日的靚仔相:

+55
+55
+55

點擊觀看更多演技大挑戰的幕後花絮:

+4
+4
+4


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。