梅小惠與曾偉權戀愛13年只記得他的好:第一日已經想同佢結婚

撰文:葉詩
出版:更新:

闊別螢幕多年的梅小惠近日到香港電台《舊日的足跡》接受車淑梅訪問,談起曾志偉回巢無綫擔任副總經理,掀起一股回巢熱,網民更選出十大最想見的回巢藝人,其中包括阮兆祥、金剛、謝天華、毛舜筠和梅小惠等。小惠更得悉自己在榜中排行第八:「我咁清楚因為周邊朋友同家人話畀我聽,叫我快啲出返嚟做,不過我都覺得電視台唔應該只有受尊重嘅藝人帶住年輕人,而冇咗40至60歲嘅中層,其實嗰啲人選大有人在,年長嘅藝人唔使咁吃力,所有電視台都應該百花齊放。 」

香港電台《舊日的足跡》節目主持車淑梅與梅小惠合照。

至於梅小惠有否收到曾志偉的回巢Love call,她說:「總之大家係好朋友,知道理念係乜嘢,有需要幫手嘅話,一定一呼百應,好似節目《雙祥見》一樣,覺得我係管家妹,可以做統籌,我就做啦。」梅小惠又指相信曾志偉:「因為佢叫志偉又姓曾,『真智慧』呀!佢教過我好多,何麗全都一樣,佢不屈不撓 、有大愛精神,邊個都會幫,喺高位亦不亢不卑。佢哋年紀都唔算輕,依然喺市場上舉足輕重,就好似我家姐梅小青60幾歲仲有人邀請佢歸隊工作,我希望做到咁樣!王祖藍更勁,佢行快我哋好多步,好有想法同堅持,唔好大驚小怪點解香港有咁多幕前人出現做高層,世界各地都一樣,好似特朗普做過主持人都可以做總統!」

談及舊友,近日無綫深夜重播梅小惠曾參演的電視劇《他來自江湖》,她卻心疼不已:「我寧願唔重播,我情願要返達哥吳孟達!之前每朝7點都會收到達哥早晨嘅微訊,鬧鐘未響㗎,一年左右大家訊息都停咗,最後一次喺舊年10月,之後就冇晒訊息,未知係咪因為佢身體唔舒服。」

+18

談起去年末梅小惠的舊愛曾偉權因肺癌離世,二人曾戀愛13年,在分手後梅小惠更一直單身至今,她淡然地說只會記得對方的好:「我21歲見到筍嘢曾偉權就飛身過去,佢又高大又靚仔,第一日已經想同佢結婚,佢冇求過婚,因為我哋已經喺埋一齊,大家最後一次見係喺爸爸喪禮,我主動多謝佢……」對於昔日往事梅小惠坦言已經放下:「我冇乜嘢,我只會記得佢保護我,佢係好演員,曾教導我,又會車出車入,我想食腸仔包佢又周圍去搵畀我,呢啲就係美好嘅回憶! 」

「以前覺得結婚生仔係必須,但後來發現原來仲可以有好多生活。」梅小惠認為有能力令自己生活舒適且有質素已經是羸家。(陳順禎攝)

梅小惠於節目內剖白感情事,被問及阮兆祥在她心碎時搬到她家隔籬居住,有否想過跟他發展?梅小惠表示:「大家唔知,其實祥仔當時都失戀,咪一齊相依為命囉,不過佢真係好錫我。我再次澄清佢係單身嘅,有興趣可以致電營業部徐小姐,哈哈!」梅小惠又相信緣份終會到來:「我相信上天會畀一個更好嘅人我!有機會我都想結婚,但係而家已經係家庭主婦,我一個人住都要煮飯洗碗,不過係一個未結婚、就快55歲嘅家庭主婦!哈哈!」

發表評論...