寶寶大過天|葉蒨文轉簽經理人合約 望挑戰做主持:我好吹得水

撰文:董欣琪
出版:更新:

憑着TVB處境劇《愛·回家之開心速遞》中「島大女神」Candy一角而為人熟悉的葉蒨文(Sophie),在劇集《使徒行者3》、《大步走》、《愛美麗狂想曲》中的演出都令人眼前一亮,近日她在《寶寶大過天》中飾演秘書Tammy,雖然戲份不多,但其實Sophie已經與公司簽了經理人合約,正式成為「親生女」,相信未來的機會會愈來愈多!

葉蒨文(Sophie)憑着TVB處境劇《愛·回家之開心速遞》中「島大女神」Candy一角而為人熟悉。(IG@sophieysm)

劇中Sophie飾演的Tammy對悠悠(岑麗香飾)這位職場媽媽態度一點都不友善,但她在接受《香港01》訪問時就笑言拍攝過程都幾順利:「香香有經驗又好人,完全唔驚佢會介意,我覺得佢都知道只係拍戲先會咁。而且我個人都好少會介意人哋嘅諗法而搞到自己怯,我都算係唔係好理人哋講咩個種人,我個人最大嘅敵人係自己,我好多時拍戲怯係因為我覺得會怕做唔到自己嘅要求,而畀自己太大壓力,不過都努力改善緊自己嘅心理質素。」

劇中Sophie飾演的Tammy經常串悠悠(岑麗香飾)。(YouTube影片截圖)

現年28歲的Sophie在2016年參選港姐後入行,由路人甲做起,之後憑着《愛·回家之開心速遞》中「島大女神」一角彈出,成功吸引不少粉絲關注。雖然Sophie入行四年幾以來參演過不少劇集,但直至去年在台慶劇《使徒行者3》中才首度孭重戲份,飾演保安局副局長千金蘇淼淼,同袁偉豪(Ben)有不少親熱戲。而在《大步走》中,Sophie出場只有短短幾分鐘,但就憑着一幕大騷白滑長腿的戲份成功搶鏡!

Sophie與Ben在《使徒行者3》中有連場激吻戲!(YouTube影片截圖)
在《大步走》中成功搶鏡!(電視截圖)

Sophie有樣有身材,一直被外界睇好有潛力上位,今年終於轉簽經理人合約,她更表示是公司主動提出:「未知公司點樣安排,但收入方面都係多勞多得,都係睇吓做咗幾多個show。(做親生女機會多啲?)我都係咁諗呀,所以其實我冇睇清楚合約都簽咗啦,應該話有睇清楚,但係冇同公司去計較啲細節。我覺得做人應該要有底線,但係唔使成日怕蝕底,始終係大公司,我做好自己就得啦,冇得計較咁多,但我有根據自己嘅本錢爭取一下嘅。至於工作機會,因為我係路人甲開始做起,其實一路都係循序漸進,所以工作一路都係慢慢愈來愈多,期待公司有更多嘅安排畀我。」

Sophie希望有機會擔任大騷司儀。(IG@sophieysm)

Sophie一直以來都以拍劇為主,她透露目前有四套劇在手,但之後都想嘗試參與更多綜藝節目:「身邊啲同事都話我個性格同外表好唔同,估唔到我咁多嘢講同埋咁鍾意搞gag,都幾適合綜藝節目。(想試邊類型嘅節目?)我好吹得水嘅,試吓帶貨都幾好玩,配音同埋偵探都可以試,同埋想試吓做大騷司儀。(覺得自己口才如何?)我覺得自己都唔差,好叻唔敢講,絕對可以試吓栽培。有時都係想要一個機會啫,我都未試過點知自己程度呢?」

+64
你可能感興趣