寶寶大過天|岑麗香呻同馬國明成日嗌交似勸人離婚:開廠嗌到收廠

撰文:董欣琪
出版:更新:

由岑麗香、馬國明、龔慈恩、商天娥等主演的TVB劇集《寶寶大過天》正在熱播,劇中飾演悠悠的香香,因為囡囡童童(梁芯語飾)進入「Trouble Two」時期而頭痛,而在現實生活中,香香的大仔Jacob亦已經兩歲,日前她上電台接受訪問時,就分享了湊仔生活,除了感嘆「媽媽唔易做」之外,更直言自己都覺得悠悠太過神經質!

岑麗香飾演的悠悠經常因為一些小事就情緒爆發,原來香香當時都覺得太誇張。(YouTube影片截圖)

香香飾演的悠悠對囡囡過分緊張,經常因為一些小事就情緒爆發,甚至惹來不少負評,狠批她演技浮誇,但原來她都曾經提出疑問:「我個角色成日發癲,好頂唔順呀,睇劇本嗰陣時我就覺得係咪咁癲嘅呢?使唔使成日都大嗌、尖叫呀?會唔會真係鬧到咁嘅呢?嗰陣時我係未明白嘅,因為我又未試過要同我個仔打交,我就要問身邊啲friend係咪真係咁。咁而家我就真係經歷緊嗰陣時拍攝嘅嘢,但都係好事嚟嘅,我會學返劇入面嘅處理方法應該係點。」

「Trouble Two」真係好難應付。(YouTube影片截圖)
飾演夫妻的馬明同香香經常嗌交。(YouTube影片截圖)

劇中香香與馬明飾演夫妻,不過就經常爭吵:「個劇情下下都要我哋嗌交,真係每一場都嗌交,由開廠嗌到收廠咁濟,好攰呀。嗰陣時我同馬明都有話我哋係說服緊人哋生BB係開心呀?定係叫人離婚呀?」雖然劇中的香香經常抱怨馬明未能分擔湊女的重任,但在現實生活中她的老公強強就是一位「神隊友」:「佢叫我安心拍劇,佢應承我日日準時放工返去幫阿仔沖涼,餵佢食嘢,氹佢瞓覺,好多謝佢。」

香香大讚老公強強係「神隊友」!(IG@heungheungeliza)

香香在2019年3月誕下大仔Jacob,而Jacob現時已經兩歲大:「佢而家兩歲識得反叛喇,見到其他曳嘅小朋友嘅嘢都學埋喇,凡事都可以係難呀。譬如沖涼,唔肯沖,你擺佢入浴缸,佢撐住隻腳,左右兩邊,真係要兩個人,一個捧住佢隻腳,一個放佢入去先得。」雖然香香大呻Jacob開始反叛,但其實她非常愛錫兩個寶貝仔,還不時在IG分享兩兄弟的合照,更有不少粉絲追問她會不會生第三胎,而香香在訪問中就笑言暫時封肚:「我開頭都想生個囡囡嘅,但係我諗下諗下呢,成屋都係男仔,我個老公就冇人同我爭囉!」

+93
你可能感興趣