專訪|4歲梁芯語演岑麗香囡囡 小小年紀做童星︰我覺得唔特別!

撰文:李婉文
出版:更新:

《寶寶大過天》裏面的「童童」是飾演岑麗香和馬國明的女兒,劇中的小朋友頑皮反叛,愛「唱反調」。現實的她,叫梁芯語,專訪當日,芯語的媽媽Apple帶她到TVB電視城,一整天的活動,加上之後的宣傳,小小年紀,行程表就被擠得密密麻麻。見到她時,Apple指女兒是處於好「眼瞓」的狀態,不過芯語依然合作,「坐定定」做訪問,沒有4歲小朋友的調皮隨處跑,非常乖巧聽話,難怪Apple也說︰「佢超級好湊!」
攝影、短片:梁碧玲
剪接:李婉文

芯語在《寶寶大過天》中可愛「鬼馬」的演技吸引觀眾的注意。(梁碧玲攝)

誤打誤撞成為《BB來了》小演員 全因芯語性格夠「定」

《寶寶大過天》並不是芯語第一次拍劇,她在第一輯的《BB來了》中,是演「允豬」的其中一位小演員,當時大概一歲左右。拍《寶寶大過天》時,也只不過是兩歲多,Apple表示其實都是誤打誤撞,那時《BB來了》開始招募小演員時,是其他媽媽朋友覺得性情較穩定的芯語是合適人選,「因為佢係由細到大都唔係好怕陌生人,咁我話試吓囉,橫掂冇嘢做,跟住send張相,又中咗喎,再casting就揀咗,咁就有第一次。」到第二套劇時,Apple問女兒有沒有興趣再試試casting,芯語爽快說好,就促成了第二次拍劇機會,聽上去絕對是有主見的小朋友。

專訪當日芯語很乖巧,有點害羞,間中哼兩句歌,又會搭媽媽嘴,不過話不算多,相信是「怕生保」,主要是媽媽說話。Apple表示女兒是安全感很足夠的小朋友,不需要「黐住」媽媽,只要跟媽媽在同一個環境就可以,所以能夠很快適應到拍劇的環境。「佢由細到大啲指令嗰方面係(接收得好),你叫佢做咩佢就會聽,當然唔計佢眼瞓、扭計嘅時候,通常小朋友一眼瞓,或者肚餓嘅時候就唔聽㗎啦,但我都覺得佢應該算係比較乖嘅小朋友。」Apple說,一旁的芯語搭一句︰「好乖咩?(Apple︰你覺得啦?)乖咗少少。」非常可愛!

芯語跟岑麗香的對手戲最多。(劇照)

點擊下圖更多精美劇照︰

+12

拍劇靠岑麗香、馬國明教 芯語醒目快上手

問芯語最喜歡哪位同劇的藝人,她不假思索的說︰「我鍾意香香媽媽!」Apple說︰「其實佢哋唔單止香香媽媽,娥姐啊,馬明爸爸,有啲位佢哋會做一次畀佢睇,話畀佢聽係點樣做,因為始終我都唔係拍戲㗎嘛!佢哋話畀佢聽要咁做,芯語就跟返佢哋咁做。」學習能力高的芯語馬上就可以演出來,所以早前連監製廖晉碩也對她讚不絕口,大讚她好記性又不害羞,劇中有不少「喊戲」,聽到「Cut」就會立即收聲,好叻女。媽媽也爆她甚至會在「Cut機」後反問他們她是否哭得很好,非常「老積」,可能在她眼中演戲就等於要懂得何時哭這樣簡單純真。

被問到芯語怎樣演「喊戲」,她童言無忌的說︰「我要鬧先喊到。」媽媽Apple笑她︰「都冇人敢鬧你!」(梁碧玲攝)

芯語現實跟「童童」性格完全相反 媽媽︰佢係好好湊!

對於管教小朋友方面,Apple明言對於芯語的規矩會管得較較嚴厲,例如教她要做一個有禮貌的人,其他發展讓她自由發揮和探索,Apple︰「例如佢要做有禮貌嘅小朋友,自理能力要比較高,唔可以乜都依賴晒屋企人。」芯語︰「我冇依賴晒㗎。」其實芯語也在靜靜聽媽媽說什麼!芯語已經開始上學,同學仔都會在電視見到她,但Apple覺得做「童星」不是一件很特別的事,一旁的芯語又說︰「我都覺得唔係咁特別咋嘛。(同學有冇同你講喺電視見到你?)有。(佢哋鍾唔鍾意你?)本身都好鍾意我㗎。」芯語表示很喜歡拍戲,因為好開心,比起讀書,更喜歡演戲。

劇中的「童童」有點反叛,但Apple大讚現實的芯語「超級好湊」︰「佢係好好湊!超級好湊!佢所有嘢都係自動波,我由細到大都覺得好好湊。」原來因為她不時會叫女兒幫手做家務、掉垃圾等。劇中有討論過「分離焦慮」等問題,但Apple笑言芯語從來沒有這個問題,「佢都係嗰啲擰轉頭就拜拜,返學喊都唔喊,但我問佢有冇掛住,佢話『我有掛住你啊,但我放咗學咪會見到你囉』。」

劇中的「童童」經常發脾氣,且又有點頑皮。(YouTube影片截圖)

點擊下圖看更多芯語的生活照︰

+5

曾因太累而想放棄拍劇 父母教芯語要守承諾完成

拍劇時,芯語只得3歲人仔,會有「扭計」不想拍劇的時候也是可以理解的,Apple直言︰「其實嗰時中間有段時間,嗰陣時細,可能佢覺得攰,佢都有講過(唔拍)嘅,我同爸爸都有教佢應承咗人嘅嘢就要做到,要堅持,因為你應承咗就要做到,做完你可以選擇之後繼續定唔繼續,但係應承咗呢段時間要拍就要拍。」之後芯語慢慢心情變開心,就繼續拍了。

記者叫芯語做一個「嬲嬲樣」,她嘟起嘴扮嬲,好搞笑。(梁碧玲攝)

點擊下圖看芯語訪問當日的表情包︰

+18

「童童」太曳惹網民批評 媽媽沒感不快︰佢都唔係咁樣有乜所謂?

因為角色的性格關係,網上有人會批評「童童」太曳,Apple也明白,不過她直言︰「我又好釋懷喎,因為佢哋拍戲嗰個童童始終都比較曳,但係梁芯語又真係好乖,識佢嘅媽媽都會講『點解佢會做到咁嘅角色』,因為喺佢哋嘅心目中就覺得,芯語本身就好乖好聽指令,點解會做到啲咁嘅嘢。」劇中「童童」會說︰「NO!NO!NO!」但芯語現實一句也不會說,但始終小朋友像一塊海綿一樣,給他們什麼就吸收什麼,Apple表示收到劇本時,也有點怕,因為「童童」很頑皮,「但係慢慢見到芯語又冇喎,佢又會同我講返『我拍戲咋嘛,又唔係真嘅』,佢會識咁樣同我講返。」例如有時拍劇時,芯語會想睡,但劇組希望她拍完,就會給她一些零食,「之後我心諗佢會唔會拍完成日咁樣問我,但係我發現,佢拍完已經唔記得咗件事。」

訪問當日,Apple其實已懷有第二胎,再拖着芯語到場,幸好女兒很乖,做什麼也會自動自覺,專訪完「直落」劇集宣傳活動,更加沒有哭過,所以專訪中,令記者最深刻的是Apple回應有關網民給女兒負評的一句︰「你話啲人話佢,但我覺得佢都唔係咁樣,咁有乜所謂?」

點擊下圖看更多專訪照片︰

同場加映︰Jessica C.孖仔女影寫真好溫馨 5歲大女Tessa愈大愈靚十足小公主

+41
發表評論...