江若琳母親作供指公司要剝晒佢啲牙 牙醫驚訝點解要咁做
撰文：吳子生
出版：更新：
江若琳同老公蕭唯展今日出席審訊。(陳順祯攝)
控方大律師在庭上盤問周，並指出周曾經講過不希望女兒江若琳加入娛樂圈，大可拒絕簽署04年份合約。周表示：「因為佢話想試吓，而且我同阿女嘅關係係好好，平時佢都好乖又孝順，咁所以我就畀佢試吓。」控方大律師追問周有否關心女兒工作情況？周作供時再次灑淚庭上：「比較少。試過有次佢喺TVB拍嘢，拍到半夜兩三點，我兩夫妻喺出面畀蚊咬等到佢放工，因為女仔做到咁夜，始終都係好唔安全，所以我哋兩個喺出面等佢。平時我係冇乜點過問佢啲嘢。試過佢半夜5點返嚟，沖過涼，瞓咗唔知有冇一個鐘，佢又要起身，之後佢同我講：『媽咪，我好想瞓覺，我做得好辛苦。」坐在身後旁聽席江若琳，聽到母親一席話再度落淚，要由老公蕭唯展安慰。
控方大律師向周指出江若琳簽約寰宇之後有箍牙，但同時工作量不多，問周是否記得？周表示記得：「佢公司咩都急。簽約又急，話佢啲牙唔靚要整，又急。」此時周再度情緒激動，淚灑繼續作供：「佢經理人同我講，公司要我搵醫生剝晒佢啲牙。咁個女又細個，我就帶佢去睇醫生，話畀佢聽。醫生聽到之後，話佢咁細個無理由要佢剝晒啲牙，醫生仲話『邊個要佢剝晒啲牙，叫嗰個人嚟畀我剝先』。」
案件編號：HCA 1225/2014