飛虎3壯志英雄|演大龍生董啟超大不同 羅樂林:內心戲好緊要

撰文:林迅景
出版:更新:

無綫(TVB)劇集的《飛虎3壯志英雄》中羅樂林飾演的「董啟超」大為搶鏡,其中有一幕,因為手下辦事不力而下令傅嘉莉(飾JJ蔣)痛下殺手,黑化的過程實在令人心寒,不少觀眾都激讚羅樂林「演乜似乜」,做大龍生夠搞笑,做董啟超又夠狠辣。

羅樂林好好戲。(電視畫面)

羅樂林接受《香港01》訪問時表示對觀眾的支持,說:「多謝觀眾支持,我會畀心機拍,盡量每個角色都有唔同。」他表示,自己的宗旨每個角色都做到不一樣的效果,尤其是同一時段出現在不同的劇集上,他說:「呢個係演員要處理嘅,好重要嘅問題。接劇之前我一定要脫離晒(上一套劇個角色),先再代入另一個角色。」

做董啟超又得。(電視畫面)

演每個角色都有要求

他分享演技心得,說:「人就係嗰個人,樣又係嗰個樣,點樣唔同呢,就係節奏多變,造型同演法都要唔同。例如要導演、監製溝通,因為8點半《愛回家》我做大龍生,9點半做《飛虎3》我又變董啟超,觀眾好易混淆,所以要煲呔換打呔西裝去配合。」他更指出參演正劇與處境喜劇的分別,說:「正劇內心戲好緊要,處境劇可以浮誇。要坐低靜落嚟諗,點樣可以令觀眾覺得(兩個角色)唔同。」

做大龍生又得。(電視畫面)

拍《飛虎3》首日直踩20個鐘

現年74歲的羅樂林透露,其實拍攝《飛虎3壯志英雄》一點都不輕鬆,因為當時正值要拍攝《愛回家之開速遞》,因為拍攝期調配的關係,他更需要同時兼顧兩劇。他說:「本來都話好忙,我70幾歲,你叫我日夜唔瞓真係幾難頂。第一日因為要夾其他演員同廠期,仲要連開20個鐘,朝早7點到第二日凌晨3點半,拍完返屋企沖個涼,朝早6點再開《愛回家》,不過好耐之前拍都唔記得嗰日拍到幾點。」他表示,在導演和監製極存邀請下才答應拍攝。

陳師奶嫌羅樂林口臭。(電視畫面)
羅樂林是佳藝電視第一代《神鵰俠侶》的楊過。(網上圖片)

拍戲不怕辛苦 羅樂林:做得演員預咗啦

長時間會否感到吃力?羅樂林笑言:「做得演員預咗啦,未到呢個年紀已經幾套戲搭埋一齊,而家唔得啦。後生嗰時最多返屋企沖個涼,打戲接時裝戲,時裝戲完咗又接返打戲,萬梓良個年代,試過拍外景廁紙卷埋一齊當枕頭,夠鐘就俾人叫開工,拍完返到廠搵啲紙巾索汗,之後又拍打戲。」羅樂林先後效力過佳藝電視、亞洲電視、邵氏等公司,當年正值武俠片大熱,所以當年的他也是武俠片的常用演員,而他亦是香港電視圈首位出演《神鵰俠侶》楊過的演員。

羅樂林係第一代神鵰大俠。(1976年佳視版《神鵰俠侶》 / Youtube截圖)

問到保持身體健康的秘訣,他表示全靠堅持運動,說:「每日都會鬆吓根,扯(打)一下拳(意思打套拳)又好,踢吓腿,活動,喺屋企仲會做吓器材。」

你可能感興趣