樊亦敏受過敏性哮喘症困擾腫脹 拍《金宵2》達71kg人生最肥

撰文:蘇國豪
出版:更新:

無綫(TVB)處境劇《愛.回家之開心速遞》經常帶歡樂給觀眾,看得大家相當開心。而在劇中飾演白天娥(三太)的樊亦敏已有多月沒有出現在劇集中,讓不少網友大呼想念三太。而適逢她有份參演的劇集《金宵大廈2》在近日播出,昨(8日)出席宣傳活動,眼見她消瘦許多且左腳受傷成為焦點,同時意味着她有可能回歸《愛》劇劇組,相信網友們都相當期待。

樊亦敏腳傷出席宣傳 。(葉志明攝)

看營養師減重

眼見出席《金宵大廈2》的樊亦敏比起從前消瘦了許多,原來不講不知她瘦了36磅,在接受訪問的時候她表示:「我拍金宵係最重,嗰時差唔多係71kg。(係你人生中最重?)係呀!你哋唔會再見到架喇!」自爆因為過敏性哮喘等身體原因,而令她身體出現腫脹,及後為了健康着想於是尋求醫生幫助:「我有睇營養師減嘅,驗到自己攝取到糖同啲奶係分解唔到,同埋麩質嘢唔係好食得,奶類會令到我嗰人腫會過敏咪戒囉,糖、麩質都戒。(有冇做運動配合?)我唯一做嘅運動就係行路,其實你唔好睇小行路呢個動作,最好行30分鐘,早上飲杯水之後慢慢行,(依家體重係幾多?)54.2kg。」而她是由去年5月開始減重,直到現在仍努力中。

樊亦敏拍攝《金宵2》時達至71KG。(樊亦敏Facebook圖片)

回歸《愛回家》望觀眾喜愛

正正因為她外形上消瘦了許多,似乎同大家在《愛》劇中見到的三太形象不一,被問到擔不擔心角色讓觀眾感到差異大,樊亦敏就表示:「睇下編劇點樣寫,觀眾開唔開心,最緊要係出咗嚟大家觀眾鍾唔鍾意,因為始終《開心速遞》都有幾年嘅時間,咁啱我曾經喺大陸拍完嘢返嚟之後大家有半年冇見到我,我再出嚟嘅時候可能有新啲嘅感覺,Fresh啲,變咗畀咗個角色有新嘅元素。」強調希望觀眾會喜愛現時的她。

樊亦敏已有多月未出現《愛回家》中。(樊亦敏Facebook圖片)

唔排除會被cut戲份

另外,她自己提到將會在4月底回歸《愛》劇,被問現時外形上消瘦許多而且左腳又受傷關係,在角色上有沒有事先同監製接觸商討?樊亦敏就表示:「其實之前有,我返到嚟香港已經同咗監製講我3月就可以返嚟拍嘢。特登返公司度咗身知道咗我新嘅Size,同埋已經送走一批好肥我着唔落嘅衫,其實依家斷斷續續我準備緊要拍嘅嘢。我着唔到高跟踭鞋就算我月尾返去我都可能未必着到, 可能有啲嘢睇下點樣夾囉。」再追問道擔不擔心因為目前狀況而遭到劇組Cut戲份,她就表示:「不排除有可能,因為本身我哋部劇裡面有好多公司嘅朋友仔有去參加,同埋因為都要睇我拍完幾嗰劇集之後(劇中單元),觀眾鍾唔鍾意我喇,睇下佢哋點樣就我寫啲角色。」還揚言《愛》劇是屬於天馬行空的劇種,可以加入許多元素的。

樊亦敏表示不排除在《愛》劇中會少了戲份。(葉志明攝)

張馳豪飾演兒子?

而對於外界傳聞三太有一個高大威猛又靚仔的兒子還未出現,傳出該角色是由《聲夢傳奇》的成員張馳豪(Aska)出演,對此樊亦敏表示不知道,亦對於誰人飾演自己的兒子亦未收到任何消息,而她自己都非常期待。三太即將回歸《愛》劇,相信無論她的外形有什麼變化都好,同樣是大家心目中那位傲慢自大的三太。

樊亦敏自己都不知道誰飾演其兒子。(askacch@IG﹑amyfan3796@IG)
+3
你可能感興趣