【心理追兇】綠葉王唔hea做依然有火 張漢斌:喺TVB冇火捱唔到!

撰文:
最後更新日期:

張漢斌在《心理追兇》飾演老差骨水爺,經常在跟著馬明、敖嘉年查案。

「有時藝員就好似足球員咁,可能成日都要做後備,我可能係後備中嘅後備,領隊唔會出你,但如果有得落場一定好努力,搏哂命,做後備嘅鬥心一定比正選嘅強烈好多,因為佢要爭取呢個咁難得嘅上陣機會….」

以大後備球員作自比的是藝員張漢斌,在《心理追兇》飾演水爺,經常跟著敖嘉年查案,那個演得不温不火、恰到好處的老差骨,現實中的他,亦像劇中的老差骨,在無綫工作24年,演過不少劇集,但相信大部份人認得他是做電視的,但未必說得出他的名字,就連維基百科亦沒有他的資料。

為演好老差骨,雖然戲份不多,但張漢斌都花盡心思,沒有hea做。

不過在電視城,台前幕後都知道他是一位用心藝員,即使戲份少,他一定做足功課,就算演閒角,張漢斌都會為角色設計去豐富演繹、亦會盡演員責任記低自己戲服(行內稱為mark衫),有看過《心理追兇》的,未必留意到他,但他亦嘗試為角色注入生命,張漢斌接受《香港01》訪問時說:「劇入面其他做CID係好有幹勁嘅,但我係演老差骨,應該咩都睇到化晒,就算大案都好似覺得係常餐咁看待,再拍落去敖嘉年佢哋咁幹勁,成隊team就立體晒喇。」觀眾、演員、甚至監製都未必看到他的用心,但張漢斌沒有因為沒人留意而hea過,因為他自知是一名後備球員,無時無刻要裝備自己,等待被派上陣的機會,但原來機會出現過一次…..

張漢斌覺得最有演出的機會是《金枝慾孽》,他在劇中飾演小靈子,和鄧萃雯有不少對手戲。

《金枝慾孽》小靈子一閃即逝

「我試過有一次落場機會,嗰次係《金枝慾孽》,我飾演小靈子,同如妃(鄧萃雯飾)都有唔少戲,我覺得都幾有發揮㗎,不過之後又做返一啲普通角色,嗰次我好唔開心咗好耐,嗰陣可能後生啦,喺屋企會發脾氣、試過掟野,我唔係嬲公司,我係嬲自己,一定係自己做得唔好,我可能太過自己做自己嘢,同人溝通得唔好,呢行人脈好緊要,但應該嗰次做得唔太好啦,所以先至再冇機會…近呢10年好似停咗喺度咁….」

張漢斌入無綫前已在一些電影中出現,其中王家衞的《東成西就》令他最難忘,他飾演周伯通(劉嘉玲飾)身邊的弟子,那次更要到澤東試鏡,好像《喜劇之王》一樣,要演繹喜怒哀樂表情給副導。(網上圖片)

綠葉王依然有火唔hea做 

《金枝慾孽》後,張漢斌一直等待下次機會來臨,等待是一種煎熬,尤其知道機會好渺茫的時候,會好容易令人「滑牙」,積極都變消極,不過張漢斌到今日都沒有變成老油條、old sea food,依然keep住道火,他說:「喺TVB冇火捱唔到㗎,派到有戲做嘅搏命做,冇戲做嘅,咪等囉,企喺主角後面,或者鏡頭都見唔到你,唔等於要hea做,我就一定唔會,萬一真係有日叫你企前面咁點呀?你企喺後面都要做戲㗎,係呀,好多時都濛咗睇唔到,但我都照做,當練習囉,反正你都要企喺度,唔好嘥咗佢囉,我其實等緊下一次機會㗎。」

張漢斌感激太太及兩個兒子的支持,尤其太太多年來的鼓勵。

張漢斌今年46歲,做戲多年不多人看到,但有一個人一直留意,就是他的太太,他說:「我哋拍咗拖10年之後結婚,佢從來都好支持我,每次都話做得幾好呀,繼續啦,希望在明天嘛,哈哈….10歲大仔都係,佢都開始對話劇有興趣,難聽說話?聽過晒啦,𠵱家唔會理,可能嗰啲人嘅口頭襌啫。」

最近張漢斌密密操肌、跑步,因為新劇要做士兵,雖然場數多,但發揮少,但他都想出鏡效果理想,呢啲咪專業囉。(微博圖片)

做士兵都要操fit 把握每個演出機會

雖然張漢斌有火,但下一個落場機會好像還未來臨,他將會入新劇,角色亦是發揮不多,但他依然交足功課,他說:「嗰PA(助理編導)話我聽,嚟緊要做兵囉,戲唔多嘅,係主角隔籬,我都做㗎,我爛做㗎!因為屋企有3個呀,所以真係要勤力啲,有時派到冇戲做嘅,係,老實講失望有少少,但都要做,嚟緊呢個,冇咩對白講,但因為要做士兵啦,咁我都去跑下步、做下gym,想瘦啲同大隻少少,PA話可能要除衫呀,咁一陣豬肉佬咁,觀眾會鬧㗎,就算唔使除,你飾演士兵大隻少少都好睇啲啦。」或者張漢斌會令人想起《喜劇之王》入面的尹天仇,對演戲好執著,但每一個追夢的人,就是要有張漢斌這種態度,即使你是大後備,連熱身機會都沒有,在等待的時候都要充滿鬥志,因為一日在球場,即是你還有機會。

+3
+2


X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。