Lolly Talk新歌全白型格造型　網民認錯做COLLAR：轉路線搶fans？

Lolly Talk明天將會出新歌，日前發布一張全白型格造型照，8位小妹妹Chok晒樣，不過有網民一睇相竟然話認錯係COLLAR，更問8位是否轉用了對方造型師，甚至推論出Lolly Talk是否想攻佔埋COLLAR粉絲市場。

Lolly Talk最近大個女！她們出道第一首歌《三分甜》以校服Look登場，之後的打扮都以切合年齡的青春氣息為主，亦因此俘虜很多男粉絲。不過近日她們的造型漸趨成熟，最新一輯電話廣告以沉色系晚裝示人，日前著同一套衫出代言活動，Sinnie更輕露事業線，被指初嘗性感。

昨日Lolly Talk宣布明天將推出新歌《一把火》，並發布一張造型照，相中8位著住白色的型格服飾，甚有隊型亦都幾好睇，不過有網民就出Post表示認錯她們做COLLAR，說：「唔講以為隔籬團」，還問她們是否聘請了COLLAR的形象指導。由於Lolly Talk與COLLAR同為《全民造星IV》出身的8人女團（So Ching未退團前），出道至今常被拿來比較，但在粉絲心中，前者偏青春可愛，後者就偏向有型，兩團定位不同，但今次的新Look，網民就覺得Lolly Talk好似COLLAR。

在《2022叱咤樂壇流行榜頒獎典禮》上，COLLAR都以全白服飾登場，配上圓扣、銀飾、交叉綁帶、手袖等，與今次Lolly Talk的造型，乍看確實有啲似，大概係今年都流行這些元素。其中COLLAR當時的造型由TeamCL負責，而Lolly Talk的新造型則估計由kayan9896御用造型師Yoyo Kwan操刀，因為她都有在Lolly Talk新歌Post留言和轉發。

由於去年COLLAR曾短暫休團，而這段空窗期，Lolly Talk曝光和人氣都愈來愈高，受歡迎程度直迫早自己半年出道的COLLAR。有網民就問，Lolly Talk是否要趁COLLAR變陣的這段期間乘機搶灘，轉型想食埋對方的粉絲市場！因為除了轉造型外，Lolly Talk就連Logo都變埋，由以往粉紅、粉藍色的團徽，變色黑色「LT」字樣，難怪令人聯想到轉型。

雖然仲未聽到Lolly Talk新歌，但造型已率先引起討論，網民有讚有彈，有人覺得轉造型是好事亦是必經階段，表示：「轉風格冇咩嘢嘅，但好睇最後佢哋Carry唔Carry到首歌同隻舞……玩死一種Style仲悶啦」「佢哋第一首歌《8 Sec》都係呢款Look，唔好講到咁新奇。」但亦有人說：「又一個太大貪想食晒所有Market嘅錯誤例子，女團嘅定位根本唔係咁。」

按圖睇更多Lolly Talk以往造型：