【撐場】留好印象、咪亂問私人問題 5招教你社交場合識真朋友

撰文:
最後更新日期:

【文章原刊於01撐場,歡迎下載香港01 app,與星級作者一同討論喜愛話題。】

文:Sam Law

相信大家都去過好多社交活動(networking events),係唔係每一次去呢啲活動都用咗你大部份的精神和精力?去社交活動嘅作用同埋好處,大家都知道,唔需要喺呢度多講。但係,點樣做先可以令你的交際成果更成功?筆者也參加過許多社交活動,相信我,這些活動真的耗盡了我當日所有能量,因為需要表現100%的自己,希望識到愈多人愈好。畢竟,建立關係都需要很多努力和工夫吧!

經過了多次「失敗」後,今次想和大家分享五個技巧,希望可以幫助大家大大提升在社交場合時的溝通能力。有睇過我之前的文章的朋友,都明白如果你想建立一個好的關係,first impression is everything:

唔好畀人覺得你去係為咗收集名片。

唔好因為缺乏自信心,覺得自己比唔上活動裏的其他人,冇嘢可以貢獻。

唔好畀人覺得你喺度hard sell自己。

最後,唔好畀人覺得你係度揀(cherry-pick)傾計對象。

第一印象很重要(視覺中國圖片)

如果畀人呢啲印象,應該都唔會識到好多朋友,不如返屋企算啦。

我以前有晒以上所講的所有行為,每次活動結束回家後,我都會計算我桌子上的名片數量來評估「我的表現」。數字愈大,就愈沾沾自喜,嗰晚就瞓得愈好。幾天後,通常會再次看這些名片,嘗試回想起那個人的談吐、性格、背景和當日談話的內容。如果有任何有建設性的follow up ,會主動聯絡他們。

其實,因為當日交談的內容很表面,建立的關係不深,所以乜嘢都唔記得。(咁我知道佢哋嘅職業係咩嘢,因為攞咗佢哋嘅名片!)所以任何follow up 的 email 都是非常機械式的,冇乜深度,因為冇乜嘢講:

嗨,很高興當日結識到你……有冇興趣再安排一個時間繼續傾計?
就係咁多!

如果連收email嗰個人都唔記得你係邊個,佢哋會點做?當然係當你係陌生人唔理你啦!

最後得出的結論是,我的社交失敗。直接啲講就係浪費咗自己啲時間。

所以我開始閱讀很多關於溝通技巧,networking的書籍。我甚至請教過搞這些活動的organiser,問他們建立關係和社交技巧的要訣。

我現在把所有學到的技巧在這裏送給正在閱讀的你。

1. First Impression is everything, yes!

對一個人的印象和睇法可以在五秒內形成,不幸的是,不論這個印象是對或錯,都不是你可以控制的。因為你的大腦會不停地把你看到的人物、事件和信息分析,去形成一些睇法和形象。人的面貌、衣着打扮、身體語言、甚至面部情緒都可以影響你大腦幫你形成的形象。所以如果你衣衫不整、愁眉苦臉,冇自信唔想講嘢的樣子,其他人看得出的。見到你咁樣,都唔想接近你和你交談。

咁應該畀人一個咩印象?

Sam's Top Tip:下一次在社交活動時,挺直胸膛,主動有信心咁去同人傾計,唔好再企喺度等人接近你。當你say hello 嘅時候,畀一個好堅定好 firm 的握手,雙手唔好插袋,比少少笑容唔好木口木面。記住講「pleasure to meet you」,望住人話畀人知你很高興有機會和他對話。咁嘅first impression 就完美,之後傾計都會舒服啲。

先要對對方有興趣(視覺中國圖片)

2. 先對人有興趣,其他人才會對你有興趣(Be interesting to be interested)

如果你對其他人的背景、專業和故事都不感興趣,咁就唔好要求其他人對你有同樣嘅興趣。有建設性嘅對話嘅意思就係,你同人分享幾多,人哋就同你分享幾多。當然好多人唔會在社交場合裏分享自己的私人生活,這是正確的。因為老實講我都唔會,因為我都唔識你!所以唔好問人哋結咗婚未,生咗幾多個小朋友,賺幾多錢同埋住喺邊。諗真啲,人哋係社交場合問你呢啲問題你都會覺得唔舒服唔想答佢地。

仲有唔好不停咁講自己嘅事,你嘅人生大計——Not interested!

其實個概念好簡單:

「你想人哋點對你,你就應該點對人——Treat people the way you want to be treated」

我同意有時候真係可以冇嘢講,然後唔小心問咗啲私人問題,明白。但係,如果你對其他人的背景和故事有真正的興趣時,我唔同意會冇嘢講。

我曾經喺社交場合同一個做銀行嘅人交談過,談話中我發現他是一個對潛水好有熱誠嘅人,所以我就開始問他點解會開始這項運動,點樣完成潛水牌的考試,面對什麼是挑戰和他喜歡去那裏享受大自然和這項運動。好明顯他對潛水比在銀行工作更加有興趣,所以他很樂意亦很興奮地回答我問嘅所有問題,仲話如果可以成為一名全職潛水教練,會夢想成真。

大家傾計投入,每人問了幾個問題,好容易就過咗一個鐘頭,當中一秒冷場都沒有。講完之後,他就問我我的興趣是什麼,現在已經好像一個真正的朋友一樣談話。眨吓眼又過咗一陣,其實在活動期間和活動之後他也介紹了朋友給我認識,我們也成了真正的朋友。當然,日後的談話都會講有關工作的事,我們會exchange notes也會互相幫忙。

咁嘅networking 算唔算成功?

Sam's top tip:傾計嘅時候唔好怕深入去討論一啲大家覺得舒服嘅話題。用Active Listening去幫助你同人交談,避免冷場。當人哋感覺到你對佢嘅故事背景有興趣時,佢會比較放鬆和開放啲同你分享。而且會因為你畀既effort而付出相同嘅興趣,感謝你做左一個好的聽眾。記住盡量避免問私人嘅問題。最後就係,如果你哋講得興奮時有其他人有興趣想加入,let them!Let the party begin!

很多人不會在社交場合分享自己的私人生活。(視覺中國圖片)

3.唔好一開始就問「你做什麼職業」這個問題 (Avoid asking the "What do you do" Question)

話畀你知點解。我哋每一個人都鍾意judge人哋,斷定人哋係某一種人。點解有人唔想話畀你知佢哋嘅工作,就係因為唔想係你未真正認識佢之前就斷定佢係某一種人。同你講佢係做律師、醫生、工程師或保險,無論係邊種職業,聽到之後其他人都有機會會粗略估計賺幾多錢,背景係乜嘢同埋做得幾成功。諗真啲,如果佢做得好成功你會唔會覺得佢在炫耀自己?再者,如果你覺得佢做緊啲低收入嘅行業,你又會唔會唔想再同佢講嘢?

咁樣畀人judge你會唔會覺得唔公平?或者如果咁樣同人比較底下,而你係「唔成功」嗰個,你會唔會失咗少少自信心?其實佢係做老闆嘅,然後感覺到你咁樣去judge佢,真係乜嘢話題乜嘢興趣都冇晒。

所以你應該明白,唔係佢哋唔想講或者是對自己的行業感到不自豪,而是因為唔希望咁樣畀你斷定佢係哪一種人。亦都有人認為這個是一個私人問題,如果你唔明點解係社交活動中應避免問私人問題,請再次閱讀第二點。

Sam's Top Tip:避免一開始就問這個問題,找一些更有趣的話題來談。

當然,喺社交場合好難避免完全唔問或者完全唔答"what do you do"呢個問題,下次再教大家點樣答。

不要只低頭玩手機(視覺中國圖片)

4. 在對話期間不要檢查你的手機

我注意到,冇嘢講嘅時候大家通常都會揼低頭開始睇自己手機check message。如今,好似已經變成一個「The Perfect Escape」的習慣。揼低頭睇手機感覺上好似安全啲,因為當你唔係直視緊一個人的時候,你暫時沒有義務跟他說話。

喺以前,當手機只有打電話和send message的功能時,睇手機根本冇可能用作為逃避談話或冇嘢講時的escape。冇得逃避,我們便會多放心機去維持一段對話。當然有時候真的有緊急電話要接收,但是我可以向你保證,有90%的時間,這些訊息都不是urgent的。如果你真的要離開去處理緊急事故,應該有禮貌地向與你交談的人解釋和道歉。

Sam's top tip:在社交活動時,手機會不停震動提醒你有新的message。學下唔好每20秒都一定要病態式check電話。唔緊急嘅message可以等,我個人覺得就算是公司email都應該等。讓他們等等!因為如果你的注意力是集中在手機上,除了是非常無禮貌的行為,還會分散你給其他人的注意力。學下點樣同人傾計,唔好永遠都依靠睇電話的這個「escape」。

不用嘗試討好所有人(視覺中國圖片)

5. 不要試圖滿足所有人 (Don't try to please everybody)

在社交場合裏,你會遇到來自不同背景,專業,經驗和文化的各種人。我可以向你保證,他們每一個人都不同,所以你跟他們的溝通技巧、問的問題都有機會不同。你不是神,不可能將自己變成「fit-for-all」。(T-shirt都至少有三種尺碼!)

你可以透過being open和誠懇的態度認識人,又或藉以避免形成偏見,但你不能阻止其他人對你構成任何偏見。一定會有一些情況,對話就是唔「click」,對你就是冇興趣。

如果你覺得對話沒有建設性、沒有進展,就有禮貌咁多謝他的談話時間和很高興認識他,跟住move on!這個不是你的錯,拍手都需要兩隻手啦!

Sam's top tip:良好的人際網絡來自建立關係時的質量,不是數量。如果你在每一個社交場合,認識到兩個真正的朋友,我話你已經非常非常之成功。認識到不同行業的人,是一種榮幸。

希望這些提示會真正幫到大家擴張你的人際網絡。
在未來,我會更具體和大家談談說話技巧。

(文章純屬作者意見,不代表香港01立場。題目為編輯所擬,文章原題為:如何有效地的擴張自己的人際網絡

【文章原刊於01撐場,歡迎下載香港01 app,與星級作者一同討論喜愛話題。】
立刻Like!讚好《01熱話》:


X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。